Белгили ошпаз Александр Белковичнинг Ўзбекистондаги гастрономик туризмга бағишланган репортажи Россиянинг оммабоп “СТС” телеканалида намойиш этилди.

Репортаж давомида бошловчи гўзал ва бетакрор жойларни кўрсатиб, Тошкент, Самарқанд ва Ўзбекистон вилоятларидаги энг мазали таомлар таклиф қиладиган ресторан ва кафеларга ташриф буюришни тавсия қилади. Мамлакат гастрономик саёҳатлар учун ажойиб жойлиги, маҳаллий ошхона эса хилма-хил таомлардан иборатлиги таъкидланади. Ўзбекистоннинг турли ҳудудларида палов, қўй гўштидан кабоб, сомса, тандир гўшт ва машҳур тандир нонлари каби асосий таомлар рецептлари билан фарқланади.

Дастур бошловчиси мамлакат миллий маданиятнинг асосий элементи бўлган меҳмондўстлик билан машҳур эканлигини таъкидлайди. Буни исботлаш учун Александр Белкович Тошкентдаги гўзал шарқона бозор ва миллий таомларнинг сара ресторанларига ташриф буюради ва у ерда турли таомларни татиб кўради. У Ўзбекистоннинг анъаналари ҳақида самимий завқ билан сўзлайди, авлоддан-авлодга ўтиб келаётган рецептларнинг сир-асрорлари билан ўртоқлашади, бир қатор миллий таомлар, жумладан, ЮНEСКОнинг номоддий мероси рўйхатига киритилган паловни татиб кўришни тавсия қилади.

Репортажда дунёнинг турли бурчакларидан сайёҳлар бу ерга нафақат диққатга сазовор жойларни томоша қилиш, балки ўзбек гастрономиясининг бетакрор оламини кўриш учун ҳам келишлари қайд этилган. Қолаверса, ўзбек халқининг самимий меҳр-оқибати ва тиришқоқлигига эътибор қаратилган.

Шу билан бирга, бошловчи Чорсу бозорига боради ва Тошкент икки минг йил давомида савдо-иқтисодий марказ сифатида муҳим ўрин тутганини урғулайди. Шу муносабат билан Ўзбекистонда гастрономик туризм жадал суръатда ривожланаётгани алоҳида таъкидланади.

Бундан ташқари, Александр Белкович Тошкент метросига ҳам тушиб, метро бекатларининг ўзига хослиги ва гўзаллигини қайд этади.