Ботир МАДИЁРОВ/«Халқ сўзи». Фарғона вилоятида етиштирилган қишлоқ хўжалиги маҳсулотларини тўғридан-тўғри Россия истеъмолчиларига етказиб бериш имконияти яратилди.

Гап шундаки, Фарғона вилояти ҳокими Хайрулло Бозоров бошчилигидаги вилоят делегацияси Россия Федерациясининг Омск вилоятига расмий ташрифи доирасида «Фрукт-Сити» улгуржи тақсимлаш логистика марказининг тантанали очилиш тадбири бўлиб ўтди.

Ўзбек тадбиркорлари таъсисчилигида 700 миллион рубль сарфланиб қурилган янги улгуржи тақсимлаш логистика маркази 9 гектар майдонни эгаллаган бўлиб, у барча замонавий инфратузилмага эга. Бозор 16 та ҳар бири 380 квадрат метрдан иборат кенг ва қулай ҳудудлардан иборат. Бу мева-сабзавот маҳсулотларини сақлаш, қайта ишлаш ва қулай шароитда сотиш имконини беради.

Ўз навбатида, бозор ҳудудида 72 та савдо дўконлари фаолияти йўлга қўйилиб, бу ерда қишлоқ хўжалиги маҳсулотлари, озиқ-овқат ва бошқа истеъмол товарлари сотилади. Марказда 450 та юк машинаси учун мўлжалланган тураргоҳлар ҳам ташкил этилди. Логистика марказининг бир қисмида Фарғона савдо уйи ҳам очилди.

— Бу марказ вилоятимиздан Россия бозорига қишлоқ хўжалиги маҳсулотларини барқарор етказиб беришда муҳим омил бўлиб хизмат қилади, — деди Фарғона вилояти ҳокими Х. Бозоров. — Натижада ҳудудларимиз ўртасидаги ҳамкорлик, ишонч ва стратегик шериклик янада ривожланади.

Бозорда 800 нафардан зиёд ҳамюртларимиз доимий иш ўрни билан таъминланади. Шу мақсадда замонавий тураржойлар, тиббий хизмат ва бошқа зарур шарт-шароитлар муҳайё этилади.

Юзма-юз мулоқотда Фарғона вилояти ҳокими тадбиркорларнинг мурожаат ва таклифларини ҳам эшитиб, ҳамкорликда бозор фаолиятини жонлантириш бўйича аниқ чора-тадбирлар режаси белгилаб олинди.