Фото: Reuters

Россиянинг АҚШдаги элчиси Анатолий Антонов Москва Украинадаги урушни тугатиш йўли сифатида кўраётган лойиҳасини тақдим этди. У «Newsweek» нашрига берган баёнотида Ғарбнинг можарони тўхтатишга қаратилган саъй-ҳаракатларини шунчаки «хаёлий истаклар» сифатида талқин қилган.

«Юқорида қайд этилган масалалар юзасидан суҳбат Оқ уйнинг «императорлик» истаги ва буйруғисиз ўтказилиши керак. Америка Қўшма Штатлари ўз иродасини барча мамлакатларга татбиқ этиш учун доимий интилиш бефойда эканлигини тан олиш вақти келди. Кўп қутблилик томон ўсиб бораётган силжишни энди тўхтатиб бўлмаслигини англаб етиш керак», деган Антонов.

Президент Владимир Путин янги музокараларга тайёрлигини билдирди, бироқ Россиянинг ҳудудий даъволарини ҳурмат қилиш кераклигини таъкидлади. Улар орасида Қрим ва бошқа минтақаларнинг аннексия қилиниши, Украинанинг нейтраллиги ва демилитаризацияси ҳам бор.

Антоновнинг таъкидлашича, Ғарбнинг ҳаракатлари тинчлик ўрнатишдан кўра «қонли лойиҳа» (уруш)ни узайтиришга қаратилган. Элчи Ҳиндистон ва Жанубий Африка каби давлатлар иштирок этган, аммо келишувга эриша олмаган Швейцария тинчлик саммити каби ташаббусларни фойдасиз эканлигини қўшимча қилган.

«Россия ҳар доим мулоқотга очиқ бўлган, аммо ультиматумларни қабул қилмайди», дейди элчи. У Москванинг АҚШ ва унинг иттифоқчилари НАТОни кенгайтириш ва 2014 йилда Украина ҳукумати ўзгаришини қўллаб-қувватлаш орқали уруш учун айнан жавобгар эканлигини маълум қилди.

Антоновнинг фикрича, коллектив Ғарб Қримнинг Россия томонидан аннексия қилганлиги тўғрисидаги даъволар билан уруш учун замин ҳозирланганлигини писанда қилиб ўтган.