Сенатнинг Бюджет ва иқтисодий масалалар қўмитаси мажлисида «2026 йил учун Ўзбекистон Республикасининг Давлат бюджети тўғрисидаги»ги ҳамда «Солиқ ва бюджет сиёсатининг 2026 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонунлар дастлабки тарзда кўриб чиқилди.

Қайд этилганидек, «2026 йил учун Ўзбекистон Республикасининг Давлат бюджети тўғрисидаги»ги Қонуннинг мақсади келгуси йил учун Ўзбекистон Республикасининг консолидациялашган бюджетини шакллантириш ва ижро этиш билан боғлиқ муносабатларни тартибга солишдан иборат.

Қўмита аъзолари таъкидлаганидек, келгуси йил Давлат бюджетида аҳоли турмуш даражасини яхшилаш, халқ фаровонлигини юксалтириш, «яшил иқтисодиёт»ни ривожлантириш ва ижтимоий соҳа мақсадларига устуворлик берилган. Жумладан, Давлат бюджети харажатларининг қарийб 55 фоизи ёки 220,0 трлн сўми ижтимоий соҳага йўналтирилмоқда.

Шунингдек, 2026 йилда консолидациялашган бюджет даромадлари 515,8 трлн сўм, харажатлар эса 567,6 трлн сўм миқдорида шакллантирилмоқда. Бунда консолидациялашган бюджет тақчиллиги ялпи ички маҳсулотга нисбатан 3 фоиздан ошмаслиги назарда тутилмоқда.

Мажлисда 2026 йилда солиқ сиёсатида асосий солиқ ставкалари қўшилган қиймат солиғи 12 фоиз, фойда солиғининг базавий ставкаси 15 фоиз, жисмоний шахслардан олинадиган даромад солиғи 12 фоиз, юридик шахсларнинг мол-мулкига солинадиган солиқ ставкаси 1,5 фоиз, қишлоқ хўжалигига мўлжалланган ерлар учун ер солиғи 0,95 фоиз, ижтимоий солиқ 12 фоиз, айланмадан олинадиган солиқ 4 фоиз миқдорида ўзгаришсиз қолаётганлиги алоҳида таъкидлаб ўтилди.

Бундан ташқари, Маъмурий жавобгарлик тўғрисидаги кодексда микрофирма ва кичик корхоналарга солиқ ҳисоботларини ўз вақтида тақдим этмаганлик учун жарима миқдори пасайтирилмоқда. Жумладан, охирги уч ой ичида солиқ ҳисоботларини ўз вақтида тақдим этиб келган солиқ тўловчиларга кейинги ҳисоботни 5 иш кунигача кечиктирган тақдирда маъмурий жарима қўлланилмаслиги ҳам белгиланмоқда.

Солиқ кодексида қўшилган қиймат солиғининг узлуксиз занжирини яратиш, аҳолининг соғлом турмуш тарзини қўллаб-қувватлаш, сув ресурсларидан оқилона фойдаланишни таъминлаш назарда тутилмоқда.

Қўмита аъзолари ўз чиқишларида ушбу қонунлар мамлакатимизнинг макроиқтисодий сиёсатида устувор этиб белгилаган вазифаларни бажариш, ижтимоий муаммоларни ҳал қилиш ҳамда тадбиркорлик субъектларини ҳар томонлама рағбатлантиришга хизмат қилишини таъкидлади.

Муҳокама якуни бўйича Қўмитанинг тегишли қарорлари қабул қилинди.