Жорий йилнинг 22 январь куни Олий Мажлис Қонунчилик палатасидаги Ўзбекистон Экологик партияси фракциясининг навбатдаги йиғилиши бўлиб ўтди.

Унда дастлаб, халқ вакиллари томонидан «Қишлоқ хўжалигига мўлжалланган ерларни иккиламчи ижарага бериш ва улардан самарали фойдаланиш тартиби такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги қонун лойиҳаси биринчи ўқишда кўриб чиқилди.

Ушбу қонун лойиҳаси билан пиллачилик кластерлари ҳамда тутчилик ва пиллачиликка ихтисослашган фермер хўжаликларига фойдаланиш мақсадида 10 гектардан кам бўлмаган ўлчамда ер майдони ажратилиши, шунингдек, қишлоқ хўжалигига мўлжалланган ер участкалари дала четларидаги коллектор-дренаж ва суғориш тармоқларининг атрофларидаги ер майдонларини қишлоқ хўжалиги маҳсулотларини етиштириш учун ўн йилгача бўлган муддатга иккиламчи ижарага берилиши мумкинлиги белгиланмоқда.

Бундан ташқари, лойиҳада ердан фойдаланувчиларнинг дала четлари ва коллектор-дренаж ҳамда суғориш тармоқларининг атрофларидаги ер майдонларидан, боғ ва токзор қатор ораларидан самарали ва оқилона фойдаланишини таъминлашга доир мажбуриятларини белгилаш таклиф этилмоқда.

Йиғилишда фракция аъзолари мазкур қонун лойиҳасининг қабул қилиниши пиллачилик соҳасини янада ривожлантириш ва пилла хомашёсини етиштиришнинг озуқа базасини янада кенгайтиришга, дала четлари, боғ ва токзор қатор оралари ҳамда коллектор-дренаж атрофларидаги фойдаланилмай келинаётган ер участкаларида маҳсулотлар етиштиришни кенгайтириш орқали аграр соҳада аҳоли бандлигини, озиқ-овқат хавфсизлигини ва нарх барқарорлигини таъминлашга ва даромадлари ошишига хизмат қилиши қайд этиб ўтишди.

Қизғин баҳс-мунозаралар якунида қонун лойиҳасини такомиллаштиришга қаратилган бир қатор таклиф ва тавсиялар берилди ҳамда қонун лойиҳаси қўллаб-қувватланди.