Жаҳонгир БОЙМУРОДОВ/«Халқ сўзи». Хабарингиз бор, шу йилнинг 29 май куни Тошкентдаги «Бунёдкор» ўйингоҳида Ўзбекистон профессионал футбол лигаси томонидан анъанавий равишда ўтказиб келинаётган Ўзбекистон Суперкубоги мусобақаси бўлиб ўтди.

Унда 2023 йилги мавсумда Суперлига ғолиби бўлган «Пахтакор» ҳамда Ўзбекистон кубогини қўлга киритган «Насаф» жамоалари ўзаро баҳс олиб боришди.

Ўйиннинг асосий вақти 1:1 ҳисобида якунлангач, ғолиб пенальтилар сериясида аниқланадиган бўлди. Ўзига хос «футбол лотереяси»да эса «аждарлар»нинг қўли баланд келди.

Шу тариқа пойтахтдан «Суперкубок»ни олиб қайтаётган «Насаф» жамоаси бугун Қарши халқаро аэропортида Қашқадарё вилояти ҳокимлиги масъуллари, ОАВ вакиллари ҳамда мухлислар томонидан тантанали кутиб олинди.

Кеча ҳиссиётлар ўзгача бўлди, — дейди «Насаф» жамоаси дарвозабони, мусобақанинг энг яхши ўйинчиси Абдувоҳид Неъматов. — Бу ғалабада жамоамиз мухлисларининг алоҳида ҳиссаси бор. Уларнинг ишончи, қўллаб-қувватлаши бизга янада куч берди. Бундан кейин ҳам мухлислар ишончини оқлашда давом этамиз.

Маълумот ўрнида: Қаршининг «Насаф» жамоаси 1997 йилдан буён мамлакатимиз ва Осиё миқёсидаги нуфузли мусобақаларда иштирок этиб келмоқда. Шу вақтга қадар жамоа 1 маротаба Осиё футбол конфедерацияси кубоги, 4 маротаба Ўзбекистон Кубогини қўлга киритган. Жамоа музейидаги «Суперкубок»лар сони эса энди учтага етди.

Шунингдек, «аждарлар» футбол бўйича Ўзбекистон миллий чемпионатининг 4 маротаба кумуш, 11 маротаба бронза медаллари соҳиби саналади.