Қашқадарё вилоят мусиқали драма театрида Туркиянинг Истанбул — Малтепа театри ижодкорлари билан ҳамкорликда Гоголнинг «Телба номалари» трагикомедияси саҳналаштирилмоқда.

Атоқли рус адиби Н. Гоголнинг «Тентакнинг номалари» сатирик қиссаси асосида Истанбул — Малтепа театри бош режиссёри Кубилай Эрделикара томонидан саҳналаштирилган трагикомедия жанридаги инценировкақаҳрамони Попрешчиннинг тақдири парадокс тарзида намоён бўлади.

— Спектаклда инсонларни минглаб туйғулар бошқариши, оқибатда бу туйғулар кишиларни эсдан оғдириш даражасида асир этиши мажозий тимсоллар орқали акс эттирилади,— дейди Қашқадарё вилоят мусиқали драма театри бадиий бўлим бошлиғи Шодия Худойназарова. — Томоша давомида қалб ва тасаввур ойинангизда бир вақтнинг ўзида муҳаббат ва нафрат, қўрқув ва жасорат, ҳаяжон ва ҳиссизлик, орзу-умид ва армон, садоқат ва хиёнат, мартаба ва хўрлик, мақтов ва таҳқир, бойлик ва камбағаллик, бахт ва бахтсизликлар аро аёвсиз кураш кетади. Бу саҳна асари қашқадарёлик томошабинларга манзур бўлади, деган умиддаман.

Турк режиссёрлари билан ҳамкорликда яратилган мазкур спектаклнинг дастлабки кунги намойиши 12 май куни Қашқадарё вилоят мусиқали драма театрида бўлиб ўтади. Энг муҳими, бу саҳна асари икки халқ ўртасидаги маданий алоқаларни янада мустаҳкамлашга хизмат қилиши шубҳасиздир.

Фахриддин Бозоров,
«Халқ сўзи»