Украина президентни Владимир Зеленскийнинг таъкидлашича, Россия тинчлик бўйича ўтказилиши режалаштирилаётган учрашувни бекор қилишга ҳамда урушни давом эттиришга уринмоқда. Бу ҳақида «BBC News» нашри хабар берди.

Унда айтилишича, Украина етакчиси Россия президенти Владимир Путинни урушни тугатиш учун ўтказилиши кутилаётган музокараларга йўл қўймаслик учун қўлидан келган барча ишни қилаётганликда айблаган. Шунингдек, Украина раҳбари Россиядан фарқли равишда ҳеч қандай учрашувдан қўрқмаслигини ҳам қўшимча қилган.

Россия ташқи ишлар вазири Сергей Лавровнинг таъкидлашича, Россия Аляскада бўлиб ўтган АҚШ-Россия саммитида Трамп томонидан кўтарилган бир қатор масалаларда муроса қилишга рози бўлган, бироқ Украина томони Вашингтондаги музокараларда илгари сурилган айрим масалалар юзасидан муроса қилишдан бош тортган. Шу туфайли Россия ташқи ишлар вазири Украинани тинчлик келишувига эришишга тўсқинлик қилаётганликда айблаган.

«Бўлиб ўтган музокараларда қабул қилиниши керак бўлган бир нечта тамойиллар борлиги ҳамма учун маълум эди. Украинанинг НАТОга аъзо бўлмаслиги ва ҳудудий масалаларни муҳокама қилиш шулар жумласидандир. Бироқ Зеленский ҳамма нарсага йўқ деди», — дейди Сергей Лавров.

Аввалроқ, АҚШ президенти Дональд Трамп Россия етакчиси билан телефон орқали суҳбатлашгандан сўнг Путин-Зеленский саммитини ўтказиш учун келишув бошлаганини, ушбу музокараларда ўзи ҳам иштирок этишини маълум қилган эди.

Украина президенти ушбу музокараларни тўлақонли қўллаб-қувватлаши, бироқ у тинчлик келишувига эришилган тақдирда Россия томонидан келажакда содир бўлиши мумкин бўлган ҳар қандай ҳужумнинг олдини олиш учун Ғарб иттифоқчиларидан хавфсизлик кафолатларини талаб қилган.