Фото: Reuters

Португалия терма жамоаси аъзолари жамоа сардори ва ҳужумчиси Криштиану Роналдуга жаҳон чемпионатига менежерини ўзи билан олиб келишга рухсат берилганидан норози бўлмоқда.

Манбага кўра, Роналдунинг менежери Рикардо Регуфе 37 ёшли футболчини доимий кузатиб юради ва фақат футболчилар кириши мумкин бўлган жойларга ҳам бемалол кириб чиқа олади. Роналдунинг шериклари нима учун унинг менежери Португалия терма жамоаси жойлашган жойда эканлигини тушунишмайди.

Аввалроқ, ОАВ Роналду бош мураббий Фернандо Сантушнинг Швейцарияга қарши ўйинда захирада қолдириш қароридан сўнг жаҳли чиққани ҳақида хабар берган эди. Бунгача гуруҳ босқичининг сўнгги ўйинида корейслар билан баҳсда алмаштирилганидан норозилигини билдирган эди.

Айтилишича, терма жамоа сардори мураббийни Қатардаги турнирни тарк этиш билан таҳдид қилган. Кейинроқ Португалия футбол федерацияси бу маълумотни расман рад этиб, Роналду Қатардаги жаҳон чемпионатида ҳеч қачон ультиматум қўймаганини билдирди.

Жаҳон чемпионатининг чорак финалида Португалия терма жамоаси Марокашга қарши баҳс олиб боради. Учрашув 10 декабрь куни Тошкент вақти билан 20:00га бошланади.