Ўзбекистоннинг Польшадаги элчихонаси томонидан қийин вазиятга тушиб қолган фуқаролар ватанга қайтарилди. Бу ҳақида «Дунё» ахборот агентлиги хабар берди.

Маълум қилинишича, элчихонага икки нафар Ўзбекистон фуқароси, жумладан, наманганлик ҳамюртимиз саломатлигидаги муаммо сабабли оғир аҳволга тушгани, иккинчиси эса қашқадарёлик юртдошимиз молиявий қийинчилик ва ҳужжатларини йўқотиб қўйгани сабабли мурожаат йўллаган.

Шундан сўнг элчихона вакиллари ушбу фуқароларни Ўзбекистонга қайтариш учун зарур чора-тадбирларни амалга оширган.

Аниқланишича, бетоб бўлиб қолган ватандошимиз инсульт ташхиси билан тиббий муассасада бўлган. Шу боис, унга Польша тиббиёт муассасаси тавсиясига мувофиқ, парвозга рухсат берилгунга қадар зарур тиббий ёрдам кўрсатилган. Яна бир юртдошимизга эса ватанга қайтиш ҳужжатлари тўғриланган.

Фуқароларимизни ватанга қайтаришда Варшава­–Рига йўналишида махсус транспортда, Рига­–Тошкент бўйича эса авиарейс орқали амалга оширилган. Ҳар икки фуқаро учун Латвияга кириш рухсатномалари расмийлаштирилиб, транзит ҳаракати таъминланган. Ригагача транспорт хизматлари ташкил этилиб, авиачипталар харид қилинган.

Авиачипта харажатлари Ўзбекистон Республикаси Миграция агентлиги ҳисобидан қопланган.