Ижтимоий тармоқларда Тошкент шаҳридаги чинорларнинг кесиб ташланаётгани акс этган видеотасвирлар кенг тарқалди. Мазкур ҳолат юзасидан Тошкент шаҳар Экология бошқармаси муносабат билдирди.

Унда айтилишича, пойтахтда қуриган ҳамда зарарланган дарахтлар қулаб тушиши оқибатида инсон мол-мулкига зарар етказилганлик ҳолатлари, шунингдек инсонлар ҳаёти ва соғлиғи хавфсизлигига таҳдид солаётгани кўп кузатилган.

Шунга кўра, Ўзбекистон Республикасининг «Ўсимлик дунёсини муҳофаза қилиш ва ундан фойдаланиш тўғрисида»ги Қонунининг 37-моддасига асосан Тошкент шаҳрида қуриган, шикастланган, зараркунандалар таъсирида кучли касалланган дарахтларни кесиш ишлари амалга оширилмоқда.

Экология бошқармасининг маълум қилишича, табиий омиллар ва зараркунандалар таъсирида касалланган, зарарланган, қуриган, инсоннинг ҳаёти ва соғлиғи, юридик ва жисмоний шахсларнинг мол-мулки хавфсизлигига таҳдид солаётган дарахтлар хатловдан ўтказилиб, Ўзбекистон Республикаси Вазирлар Маҳкамасининг 2022 йил 22 февраль 86-сон қарори билан тасдиқланган Низомнинг 1-иловасига мувофиқ тегишли рухсатномалар асосида кесиш ишлари амалга оширилмоқда.