Франция пойтахтида ўтказилаётган ёзги Олимпиада ўйинларида ўзбек спортчилари ўз иштирокларини давом эттирмоқда.

Таэквондо бўйича Ўзбекистон терма жамоаси аъзоси Озода Собиржонова -67 кг вазн тоифасида бронза медали учун баҳсда қатнашди.

Ҳамюртимиз бельгиялик Сара Чаари қарши кечган қизиқарли баҳснинг биринчи раундида 16:2 ҳисобида ғалаба қозонди. Иккинчи раундда эса 2:3 ҳисобида ютқазиб қўйди. Ҳал қилувчи учинчи раунд эса 4:5 ҳисобида рақиб фойдасига ҳал бўлди. Қайд этиш керакки, Сара Чаари ушбу вазнда жаҳоннинг биринчи рақамли спортчиси ҳисобланади.

Жаҳоннинг 3-рақамли спортчиси сербиялик Александра Перишичнинг финалга етиб бориши Собиржоновага медаль учун имконият яратганди. Ўтиш баҳсида Озода таиландлик Сасикарн Тонгчанга қарши кураш олиб бориб, умумий 2:1 ҳисобида мағлуб этганди.

Маълумот учун айтиш мумкинки, Собиржонова Озода Обиджон қизи 2002 йилнинг 7 декабрь санасида Жиззах вилояти Зомин туманида дунёга келган.

Аввалроқ, Улуғбек Рашитов ва Ҳасанбой Дўсматовлар икки каррадан Олимпиада олтин медаль соҳиблари бўлган эди.