Fransiya poytaxtida oʻtkazilayotgan yozgi Olimpiada oʻyinlarida oʻzbek sportchilari oʻz ishtiroklarini davom ettirmoqda.

Taekvondo boʻyicha Oʻzbekiston terma jamoasi aʼzosi Ozoda Sobirjonova -67 kg vazn toifasida bronza medali uchun bahsda qatnashdi.

Hamyurtimiz belgiyalik Sara Chaari qarshi kechgan qiziqarli bahsning birinchi raundida 16:2 hisobida gʻalaba qozondi. Ikkinchi raundda esa 2:3 hisobida yutqazib qoʻydi. Hal qiluvchi uchinchi raund esa 4:5 hisobida raqib foydasiga hal boʻldi. Qayd etish kerakki, Sara Chaari ushbu vaznda jahonning birinchi raqamli sportchisi hisoblanadi.

Jahonning 3-raqamli sportchisi serbiyalik Aleksandra Perishichning finalga yetib borishi Sobirjonovaga medal uchun imkoniyat yaratgandi. Oʻtish bahsida Ozoda tailandlik Sasikarn Tongchanga qarshi kurash olib borib, umumiy 2:1 hisobida magʻlub etgandi.

Maʼlumot uchun aytish mumkinki, Sobirjonova Ozoda Obidjon qizi 2002-yilning 7-dekabr sanasida Jizzax viloyati Zomin tumanida dunyoga kelgan.

Avvalroq, Ulugʻbek Rashitov va Hasanboy Doʻsmatovlar ikki karradan Olimpiada oltin medal sohiblari boʻlgan edi.