Халқаро атом энергияси агентлиги (МАГАТЭ) бош директори Рафаэл Гроссининг таъкидлашича, Эрон бойитилган уран захирасининг деярли барчасини сақлаб қолган. Унинг сўзларини «Коммерсант» келтирди.

Гроссининг айтишича, Исроил ва АҚШ томонидан амалга оширилган ҳужумларга қарамай, 60%гача бойитилган ураннинг деярли барчаси ҳануз Эронда сақланмоқда.

«Зарар жуда катта бўлди, бироқ баҳоларимизга кўра, 60 фоизгача бойитилган ураннинг катта қисми, агар ҳаммаси бўлмаса, шунингдек 20%, 5% ва 2%гача бойитилган материал ҳамон у ерда. Бу материал ўша ерда қолмоқда ва биз уни аниқ бир якуний мақсад билан боғламаган бўлсакда, мазкур даражада — қуролсозлик даражасига яқин бойитилган материалнинг мавжудлиги ўзиёқ жиддий хавотир уйғотади», — деди у.

Қайд этилишича, Эрон ҳукумати ҳали-ҳануз МАГАТЭ инспекторларини мамлакатнинг энг муҳим ядровий объектлари — Фордо, Натанз ва Исфаҳон мажмуаларига киритмаган.

Эслатиб ўтамиз, июнь ойида Исроил Эроннинг ядровий ва мудофаа инфратузилмасига қарши ҳарбий операция ўтказган эди. АҚШ ҳам операцияга қўшилиб, Фордо, Натанз ва Исфаҳондаги объектларга зарбалар берган.

АҚШ расмийлари ўшанда Эрон ядровий дастури «бутунлай ишдан чиққани», бойитилган уран эса Эрон илмий марказларининг вайроналари остида қолиб кетгани ҳақида баёнот берган эди.