Ўзбекистонлик ёш актриса Сабрина Жабборова Туркияда жарроҳлик амалиётидан ўтадиган бўлди. У хонанда Озода Нурсаидованинг «Дилбарим» қўшиғига клип суратга олиш жараёнида автомобил уриб кетиши оқибатида жиддий жароҳат олган эди. Актрисанинг ижтимоий тармоқларда жойланган видеосида у Ўзбекистон халқи томонидан билдирилган қўллаб-қувватлаш ва моддий ёрдам учун миннатдорчилик билдирди.

Сабринанинг сўзларига кўра, халқ томонидан унга ёрдам сифатида картасига маблағ ўтказилмоқда ва айнан шу маблағ эвазига Туркияда операция қилинади. У онаси билан Туркияга учиб кетаётгани ва у ердаги профессор томонидан кўрикдан ўтиши режалаштирилганини айтиб ўтди. Шунингдек, операциянинг аниқ харажатлари шифокорлар текширувларидан сўнг маълум бўлишини таъкидлади.

Шу пайтгача воқеага бевосита алоқадор бўлган хонанда Озода Нурсаидова ўзининг кўплаб тафсилотлардан бехабар бўлганини айтиб, Сабрина олдида узр сўради. Унинг сўзларига кўра, у Жабборованинг ҳолати ва операция натижасида оёғи 7 сантиметрга калта бўлиб қолганини ижтимоий тармоқларда видео чиқиши билан билган. У шу вақтгача актрисанинг реабилитация жараёнидан ўтаётганини ўйлаганини айтиб, вазиятдан тўлиқ хабардор бўлмагани учун афсусдалигини билдирди.

«Эндиликда Сабринага 2-3 босқичли мураккаб операция қилиш керак экан. Шу сабаб, уни соғлиғига бефарқ бўлмаган барча инсонларга ўз миннатдорчилигимни билдираман. Ўйлайманки, ушбу жарроҳлик амалиётидан кейин Сабрина соғлиғини тиклаб, олдинги ҳаётига қайтади», — дея изоҳ берди хонанда.

Хонанда Муниса Ризаева эса Сабрина учун Туркиядан шифокор излаш жараёнида фаол иштирок этганини таъкидлади. Унинг сўзларига кўра, Туркияда кўплаб шифокорлар бундай мураккаб операцияни амалга оширишга рози бўлмаган. Бироқ, охир-оқибат битта профессор операцияни ўз зиммасига олишга рози бўлди.

«Шундан сўнг, биз Сабринанинг карта рақамини ўз саҳифаларимизда тарқатдик. Жуда кўп инсонлар унга ёрдам бериш учун маблағ ўтказмоқда. Картада ҳозир етарлича сумма йиғилди. Бу пуллар эвазига биз Сабринага Истанбулга авиачипталар олдик, у ердан уй ижарага олдик, шифокорлар билан келишиб олдик», — деди Муниса Ризаева.

Шунингдек, Ризаева яна кимдир Сабринага ҳомийлик қилишни истаса, бу жуда катта ёрдам бўлишини таъкидлади. Айни пайтда актрисанинг соғлиғини тиклаш ва операция харажатларини қоплаш учун жамғарма ишлашда давом этмоқда.