Фото: Маданият вазирлиги

Маданият вазирлиги хонандаларга мамлакат шаънини эъзозлаш, одоб-ахлоқ, маданият, ўзбекона қадриятларни унутмаслик каби муҳим масалалар юзасидан тушунтириш берди. Бу ҳақда вазирлик матбуот хизмати хабар берди.

Қайд этилишича, Маданият вазирлигида хонандалар иштирокида концерт-томоша фаолиятида олиб борилаётган маданий-маърифий ишлар ҳамда «Санъаткор одоби» мавзусида йиғилиш бўлиб ўтган.

Йиғилиш кун тартибидан мамлакатимизда ижод қилаётган санъаткорларнинг маънавий-маданий фаолияти ҳамда «Санъаткор одоб-ахлоқи», Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида»ги қонуннинг мазмун-моҳияти, санъаткорларнинг концерт-томоша фаолияти учун лицензия талаб ва шартлари ҳамда муаллифлик ҳуқуқи каби масалалар ўрин олган.

Йиғилиш аввалида Президентнинг 2024 йил 14 ноябрдаги «Тадбиркорлар ҳуқуқлари ва қонуний манфаатларини ишончли ҳимоя қилиш чора-тадбирлари тўғрисида»ги 184-фармонининг мазмун-моҳияти тушунтирилди. Концерт-томоша фаолиятини амалга ошириш соҳасига оид мажбурий талаблардан хабардорлигини ошириш бўйича фармон билан тасдиқланган низомнинг тартиб-таомили бўйича концерт ташкилотчилари ва санъаткорларга тушунтириш берилган.

Йиғилиш давомида «Лицензиялаш, рухсат бериш ва хабардор қилиш тартиб-таомиллари тўғрисида»ги қонунга асосан «Ўзбекконсерт» давлат муассасаси томонидан концерт-томоша фаолиятини амалга оширишда санъаткорларнинг мажбурий талабларга риоя қилишини ҳамда асосий лицензия талабларида ижрочиларнинг «концерт-томоша соҳасида у ёки бу динни тарғиб қилмаслик» масалалари ҳам муҳокама қилинган.

Шунингдек, йиғилишда Конституция қонунлари ва бошқа қонунчилик ҳужжатларига сўзсиз риоя этиши, бошқа давлатларда бўлганида ўз мамлакат шаънини эъзозлаши одоб-ахлоқ, маданият, ўзбекона қадриятларни унутмаслик ҳақида сўз борган.

Вазирнинг биринчи ўринбосари Баҳодир Аҳмедов миллий урф-одатлар, қадриятлар ва анъаналарга ҳурмат билан муносабатда бўлиш, дабдабабозлик, шоҳона ҳаётни кўз-кўз қилмаслик ва бошқа салбий иллатларга йўл қўймаслик, жамоат жойларида, атрофдагилар эътиборини тортувчи ортиқча салбий ҳаракатларга йўл қўймаслик ҳақида таъкидлаб ўтган.

Шу билан бирга куй-қўшиқларнинг мазмунига эътибор қаратиш, муаллифлик ҳуқуқларининг бузилиш ҳолатларига ҳам тўхталиб ўтди. Шунингдек, ўз ижодлари давомида ватанга муҳаббат, садоқат, ватанпарварлик руҳидаги қўшиқларни кўпайтириш, ўсиб келаётган ёш авлодга намуна бўлишлари айтиб ўтилган.