Фото: Архив сурат

Ўзбекистонда тадбиркорлар учун мавсумий савдо ва умумий овқатланиш фаолиятини амалга ошириш мақсадида давлат ташкилотлари ҳудудидан фойдаланиш имконияти яратилади. Бу ҳақда Норма хабар берди.

Вазирлар Маҳкамаси томонидан қабул қилинган қарорга мувофиқ, 2025 йил 1 октябрдан бошлаб тадбиркорлик субъектлари ўз бино ва иншоотларига туташган ҳудудларни, шу жумладан давлат ташкилотлари ва муассасалари доимий фойдаланишида бўлган ерларни ҳам ижарага олишлари мумкин бўлади.

Таълим ва тиббиёт муассасалари ҳудудлари бундан мустасно.

Ижара қандай шартлар асосида амалга оширилади?

— Аукционсиз, тўғридан-тўғри келишув орқали (агар ер тадбиркор объектига туташган бўлса);

— Ижара муддати — бир календарь йили, кейинчалик узайтириш имкони билан;

— Ижара тўлови — ер солиғи ставкасига нисбатан 3 баробаргача белгиланиши мумкин;

— Барча шартномалар электрон тарзда Давлат солиқ қўмитаси назоратидаги махсус тизимда рўйхатдан ўтказилади.

Қўшимча талаблар:

— Барча мавсумий шохобчалар аввалдан тасдиқланган схема ва архитектуравий дизайн-код асосида жойлаштирилади;

— Капитал қурилиш ишлари, ташқи кўринишни ўзгартириш розиликсиз тақиқланади;

— Шартлар бузилса — объект демонтаж қилинади, ижара шартномаси бекор қилинади.

1 октябргача маҳаллий ҳокимиятлар:

— Ноқонуний жойлаштирилган объектларни инвентаризация қилади;

— Ер майдонларини қонунийлаштириш ёки бўшатиш чораларини кўради;

— Барча тасдиқланган жойлашув схемалари ва дизайн-кодларни расмий сайтларга жойлаштиради.

Шунингдек, ижара тўловларини давлат ташкилотлари ва маҳаллий бюджетлар ўртасида тақсимлаш тизими жорий этилади. Бу маҳаллий ҳокимиятларни тадбиркорликни расмийлаштиришда манфаатдор этиши кутилмоқда.