Шоира ЭШБОЕВА/«Халқ сўзи». Шу кунларда юртимиз кўплаб халқаро тадбирларга мезбонлик қилмоқда. Шундай халқаро тадбирлардан бири пойтахтимизда бўлиб ўтаётган Парламентлараро иттифоқнинг 150-юбилей ассамблеясидир. Унда 140 га яқин давлатдан 105 нафар парламент етакчилари, 2 мингдан ортиқ парламент аъзолари ва 50 та халқаро ташкилот делегатлари иштирок этди.

Нуфузли тадбир доирасида тадбир қатнашчилари Парламентлараро иттифоқ Бош котиби Мартин Чунгонг ва Жаҳон соғлиқни сақлаш ташкилоти соғлиқ хавфсизлиги департаменти директори Др. Стелла Чунгонг Агентлик директори А.Саъдуллаев ҳамроҳлигида пойтахтимиздаги Ёшлар ижод саройи мажмуасига ташриф буюрди. Хорижий меҳмонлар ёшлар учун яратилган кенг имкониятлар, оммабоп лойиҳалар билан яқиндан танишиб, ушбу ташаббусларни илиқ фикрлар билан эътироф этди.

— Мен Ўзбекистон ёшларини жаҳон миқёсида эришаётган ютуқларини кузатиб бораман, — дейди Мартин Чунгонг. — Юртингиздаги ёшларни қўллаб-қувватлашга қаратилган лойиҳа ва ташаббуслар алоҳида эътирофга лойиқ. Албатта, бундай ишлар келажакда ўз мевасини беради.

Учрашув давомида жаноб Мартин Чунгонг «Кулолчилик академияси»га ҳам ташриф буюриб, ёшлар билан бирга амалиёт машғулотларида иштирок этди ва мамлакатимизда миллий санъатлар изчил давом эттирилаётганидан мамнунлигини билдирди.