Қозоғистон ва Ўзбекистон чегарасида ёнилғи-мойлаш материалларини контрабанда йўли билан олиб ўтиш учун қазилган 450 метрлик туннель аниқланди. Бу ҳақда «Tengrinews» хабар қилди.

Туннель Қозоғистон прокуратураси томонидан мувофиқлаштирилган ҳолда Туркистон вилояти бўйича ММА департаменти ва Миллий хавфсизлик қўмитаси департаменти иштирокида, шунингдек, Ўзбекистон ҳуқуқни муҳофаза қилувчи органлари кўмагида ўтказилган операция натижасида фош қилинди.

Тергов маълумотига кўра, туннель орқали контрабанда фаолияти икки ой давом этган. Унинг доирасида барқарор логистика йўлга қўйилган, хориждан молиялаштириш таъминланган ҳамда нефть маҳсулотларини ташиш амалга оширилган.

Ўзбекистон ҳуқуқни муҳофаза қилувчи органлари ҳам ўз ҳудудида тегишли чораларни кўрган. Қўшма тадбирлар натижасида жиноий схеманинг барча иштирокчилари, жумладан, Ўзбекистон фуқаролари ҳам аниқланган.

Маълумотларга кўра, Қозоғистонда ҳам гумонланувчи сифатида беш киши жавобгарликка тортилган бўлиб, уларнинг барчаси Қозоғистон фуқаролари бўлишган.

Аввалроқ Қашқадарё вилоятида фуқаронинг томорқасида 22 туп «каннабис» ўсимлиги экилгани аниқлангани тўғрисида хабар қилгандик.