14 февраль куни "Миллий" телеканали орқали турк ва ўзбек ижодкорлари ҳамкорлигининг маҳсули бўлган "Мендирман Жалолиддин" тарихий бадиий сериалининг биринчи қисми эфирга узатилди. Биринчи қисм премьерасидан сўнг фильмда иштирок этган турк ва ўзбек киноактёрлари, маданият ходимлари, журналистлар ҳамда санъат вакиллари билан жонли эфирда суҳбат ташкил этилди.

"Халқ сўзи" Жалолиддин Мангуберди образини гавдалантирган Туркиялик актёр Эмре Кивилжимнинг фикрлари билан қизиқди.

Эмре Кивилжим ўзбек актёрлари билан ишлаш қийинчилик туғдирмаганини аксинча жудаям осон бўлганини, суратга олиш давомида ўзбек актёрлари турк тилидан дарс олишганини айтаркан, кейинги сафар у ҳам, албатта, ўзбек тилини ўрганиш ниятида эканлигини айтди.

"Бу сафар, Иншаллоҳ, биз ўзбекча ўрганамиз. Сўз бераман, ўзбекча ўрганаман. Келаси сафар келганимда ўзбекча гаплашамиз" (кулиб).

Бундан ташқари Эмре Кивилжим Ўзбекистоннинг тарихий шаҳарлари Бухоро, Самарқандга саёҳат режалаштиргани, улар орасида энг кўп Хоразмга боришни исташини айтди.

"Энг кўп Хоразмга боришни истайман. У ерларни кўришни истайман. Эски маданият, у тупроқларга Жалолиддин ўлароқ қадам босишни, у тупроқларни ўз қўлим билан ушлаб кўришни истайман".

Эмре Кивилжим келажакда яна ўзбек ижодкорлар билан ҳамкорлик мавзусида сўзларкан узун бир йўлга чиқишгани ва фақат бу сериал эмас балки кўплаб лойиҳалардаги ҳамкорлик узоқ йиллар давом этишини айтди.

Сериалда Султон Аловуддин ролини маҳорат билан ижро этган турк актёри Каан Ялчинни ҳам суҳбатга тортдик ва ўзбек ижодкорлари билан ишлаш қандай кечгани, у ижро этган образ ҳақидаги фикрлари билан қизиқдик.

"Йўқ, ўзбек актёрлари билан ишлаш ҳечам қийин бўлмади. Улар ўз ишларининг устаси, профессионал ва жудаям очиқ кайфиятли инсонлар экан. 

Мен гавдалантирган Султон Аловуддин образи ҳақида гапирсам, у шундай инсонки, агар ўзига қўйиб берилганида, қарорлари фақат ўзидан чиққанида жудаям фойдали бир инсон бўларди. Аммо Туркон Хотуннинг таъсири, саройдаги ўйинлар унга ўзи қарор қабул қилишига йўл қўймайди. Булар унинг иқтидорида, қарорларида баъзи номувофиқликларга сабаб бўлади. Султон Аловуддин аслида ватанини, халқини, тупроқларини севган бир адолатли ҳукмдор".

Актёр Ўзбекистонга сафари, мамлакат ҳақидаги таассуротлари ҳақида ҳам гапирди.

"Тошкентга кеча келдик, ҳали кўп жойларга боришга фурсат бўлмади. Ҳозирча фақат меҳмонхона атрофини кездик холос. Бу ердаги дўстларимиз соғ бўлишсин, улар бизни оқшом ўз уйларида ҳам меҳмон қилишди. Мазали таом едик биргаликда. Кўп жойларга боришга фурсат бўлмади, Иншаллоҳ, ҳаммаси режадагидек бўлса эртага Самарқандга борамиз. Менинг ҳақиқий саройим Хоразмда экан (кулади) лекин Самарқандда ҳам менинг саройимга ўхшаш жойлар кўп экан, у ерларни ҳам айланиб келамиз", дейди Каан Ялчин.

Маълумот учун, Ўзбекистон ташаббуси билан "Боздағ фильм" томонидан суратга олинган "Мендирман Жалолиддин" сериалининг биринчи қисми 14 февралда "Миллий" телеканалида эфирга узатилди.

Ўткирбек Қаҳҳоров суҳбатлашди