Фото: Спортни ривожлантириш вазирлиги матбуот хизмати

Россиянинг Владивосток шаҳрида давом этаётган VII «Осиё болалари» халқаро спорт ўйинлари дастурининг 6-кунги мусобақалари ўз якунига етди.

Ўзбекистонлик ёш спортчилар халқаро спорт ўйинларида фаол иштирок этиб, самбочиларимиз 9 та, дзюдочиларимиз 4 та, соҳил волейболидаги спортчиларимиз 1 та совринли ўрин билан умумий медаллар жамғармасини яна бойитишди.

Еттинчи кунги беллашувларни Ўзбекистон спорт делегацияси 25 та олтин, 18 та кумуш ҳамда 28 та бронза, жами 71 та медаль билан қаршилашмоқда.

Бугунги баҳслар сарҳисобига кўра, ватанимиз ёш спортчилари 12 та давлат, Россия Федерациясининг 8 та алоҳида жамоаси орасидаги ўрнини бир поғона яхшилаб олди. Кеча ҳамюртларимиз 3-ўринга кўтарилишган бўлса, бугун 2-ўринни эгаллаб турибди.

Эслатиб ўтамиз, эртага, 4 август куни «Осиё болалари» спорт ўйинлари дастурига биноан спортчи ёшлар бадминтон, камондан отиш, бокс, мини-футбол йўналишларидаги саралаш баҳсларида қатнашса, дзюдо, маст-рестлинг, ўқ отиш спорт турларида медаллар учун кураш олиб боришади.