Анжуман

“Оила” илмий-амалий тадқиқот маркази “Соғлом оила — соғлом жамият” концептуал ғоясини ҳаётга татбиқ этишга йўналтирилган ягона давлат сиёсатини олиб боради, оиланинг репродуктив саломатлиги ва демографик ривожланишини, унинг фаровонлиги ва хотиржамлигини ошириш масалаларини комплекс ўрганади.

Президентимизнинг 2018 йил 2 февралдаги “Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида”ги Фармонида белгиланган ушбу вазифалар ижроси қай даражада таъминланмоқда? Пойтахтимизда Ўзбекистон Республикаси Вазирлар Маҳкамаси ҳузуридаги “Оила” илмий-амалий тадқиқот маркази томонидан ўтказилган анжуманда ушбу саволга атрофлича жавоб изланди.  

Ўзбекистон Хотин-қизлар қўмитаси, “Тараққиёт стратегияси” маркази билан ҳамкорликда ўтказилган тадбирда сиёсатшунослар, ҳуқуқшунослар, олимлар, профессор-ўқитувчилар, соҳа мутахассислари, давлат ва нодавлат, халқаро ташкилотлар вакиллари иштирок этди.

Қайд этилганидек, марказ нотинч ва муаммоли оилаларни аниқлаш ва уларнинг манзилли рўйхатларини тузиш, маънавий-ахлоқий муҳитни соғломлаштириш, оилавий муносабатларни мустаҳкамлаш, оила-никоҳ муносабатлари соҳасида амалиётни ўрганиш ва тажриба алмашиш мақсадида давлат органлари, жамоат ташкилотлари, халқаро ва хорижий ташкилотлар, илмий-тадқиқот муассасалари билан ўзаро ҳамкорликда фаолият олиб бормоқда.

Анжуманда “Ўзбекистонда оиланинг демографик ривожланиши”, “Репродуктив саломатликни ҳимоя қилиш ва оилани режалаштириш”, “Тарихий-маданий анъаналар ва замонавий оила модели”, “Кореяда намунали оиланинг модели”, “Оилавий муносабатларнинг ижтимоий-психологик муаммолари ва уларни ҳал этиш йўллари”, “Оилани самарали қўллаб-қувватлашнинг халқаро амалиёти” ва бошқа муҳим мавзуларда тақдимотлар ўтказилди. 

Иштирокчилар оила-никоҳ муносабатлари соҳасидаги илғор хорижий амалиётни илмий таҳлилларга таянган ҳолда чуқур ўрганиш, халқаро ва хорижий ташкилотлар, илмий-тадқиқот муассасалари билан узвий ҳамкорлик қилиш ва тажриба алмашишни йўлга қўйиш, ёшларга оилавий муносабатларнинг ҳуқуқий ва психологик асосларини ўргатиш, ажрашишларнинг олдини олиш борасида ўз мулоҳазаларини баён этдилар. Шунингдек, оиладаги маънавий-ахлоқий қадриятларни мустаҳкамлаш борасида тизимли тарғибот-ташвиқот ишларини йўлга қўйиш, илмий-маърифий адабиётлар, рисолалар, ўқув-услубий, таҳлилий қўлланмалар тайёрлаш ва тарқатиш, ахборот-коммуникация технологиялари имкониятларидан самарали фойдаланиш орқали замонавий намунали оиланинг мезонларини ишлаб чиқиш масалаларида креатив фикр-мулоҳазалар ўртага ташланди.

Қизғин баҳс-мунозаралар, савол-жавобларга бой ўтган анжуманда “Ўзбекистон Республикасида оила институтини мустаҳкамлаш” Концепцияси лойиҳасини ишлаб чиқиш юзасидан билдирилган таклиф ва тавсиялар умумлаштирилди, истиқболда амалга ошириладиган ишлар белгилаб олинди.

Дилшод КАРИМОВ,
“Халқ сўзи” мухбири.