Anjuman

“Oila” ilmiy-amaliy tadqiqot markazi “Sog’lom oila — sog’lom jamiyat” kontseptual g’oyasini hayotga tatbiq etishga yo’naltirilgan yagona davlat siyosatini olib boradi, oilaning reproduktiv salomatligi va demografik rivojlanishini, uning farovonligi va xotirjamligini oshirish masalalarini kompleks o’rganadi.

Prezidentimizning 2018 yil 2 fevraldagi “Xotin-qizlarni qo’llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to’g’risida”gi Farmonida belgilangan ushbu vazifalar ijrosi qay darajada ta’minlanmoqda? Poytaxtimizda O’zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi tomonidan o’tkazilgan anjumanda ushbu savolga atroflicha javob izlandi.  

O’zbekiston Xotin-qizlar qo’mitasi, “Taraqqiyot strategiyasi” markazi bilan hamkorlikda o’tkazilgan tadbirda siyosatshunoslar, huquqshunoslar, olimlar, professor-o’qituvchilar, soha mutaxassislari, davlat va nodavlat, xalqaro tashkilotlar vakillari ishtirok etdi.

Qayd etilganidek, markaz notinch va muammoli oilalarni aniqlash va ularning manzilli ro’yxatlarini tuzish, ma’naviy-axloqiy muhitni sog’lomlashtirish, oilaviy munosabatlarni mustahkamlash, oila-nikoh munosabatlari sohasida amaliyotni o’rganish va tajriba almashish maqsadida davlat organlari, jamoat tashkilotlari, xalqaro va xorijiy tashkilotlar, ilmiy-tadqiqot muassasalari bilan o’zaro hamkorlikda faoliyat olib bormoqda.

Anjumanda “O’zbekistonda oilaning demografik rivojlanishi”, “Reproduktiv salomatlikni himoya qilish va oilani rejalashtirish”, “Tarixiy-madaniy an’analar va zamonaviy oila modeli”, “Koreyada namunali oilaning modeli”, “Oilaviy munosabatlarning ijtimoiy-psixologik muammolari va ularni hal etish yo’llari”, “Oilani samarali qo’llab-quvvatlashning xalqaro amaliyoti” va boshqa muhim mavzularda taqdimotlar o’tkazildi. 

Ishtirokchilar oila-nikoh munosabatlari sohasidagi ilg’or xorijiy amaliyotni ilmiy tahlillarga tayangan holda chuqur o’rganish, xalqaro va xorijiy tashkilotlar, ilmiy-tadqiqot muassasalari bilan uzviy hamkorlik qilish va tajriba almashishni yo’lga qo’yish, yoshlarga oilaviy munosabatlarning huquqiy va psixologik asoslarini o’rgatish, ajrashishlarning oldini olish borasida o’z mulohazalarini bayon etdilar. Shuningdek, oiladagi ma’naviy-axloqiy qadriyatlarni mustahkamlash borasida tizimli targ’ibot-tashviqot ishlarini yo’lga qo’yish, ilmiy-ma’rifiy adabiyotlar, risolalar, o’quv-uslubiy, tahliliy qo’llanmalar tayyorlash va tarqatish, axborot-kommunikatsiya texnologiyalari imkoniyatlaridan samarali foydalanish orqali zamonaviy namunali oilaning mezonlarini ishlab chiqish masalalarida kreativ fikr-mulohazalar o’rtaga tashlandi.

Qizg’in bahs-munozaralar, savol-javoblarga boy o’tgan anjumanda “O’zbekiston Respublikasida oila institutini mustahkamlash” Kontseptsiyasi loyihasini ishlab chiqish yuzasidan bildirilgan taklif va tavsiyalar umumlashtirildi, istiqbolda amalga oshiriladigan ishlar belgilab olindi.

Dilshod KARIMOV,
“Xalq so’zi” muxbiri.