Ғ. ОТАЖОНОВ/«Халқ сўзи». Нукус шаҳридаги Қорақалпоқ давлат академик мусиқали театрида Ўзбек тили байрами муносабати билан тантанали тадбир ўтказилди. Унда Қорақалпоғистон Республикаси Жўқорғи Кенгесининг Раиси Аманбай Оринбаев сўзга чиқиб, йиғилганларни байрам билан табриклади.

Таъкидланганидек, ўзбек тилига бўлган ҳурмат кўп миллатли халқимизнинг маънавий дунёсини янада бойитишга, миллий қадриятларимизни асраб-авайлаш ва уларни улуғлашга қаратилган ғамхўрликнинг ифодасидир.

Сўнгги йилларда мамлакатимизда ўзбек тилининг давлат тили сифатидаги нуфузини оширишга алоҳида эътибор берилиб, бу борада кенг кўламли ишлар амалга оширилмоқда.

Давлат тилини чуқур ўрганиш, уни илмий асосда ҳар томонлама ривожлантириш ва қўллаш доирасини кенгайтириш юртимиз тараққиёти ҳамда халқимиз келажагини белгилайди. Ёшларни она Ватанга садоқат руҳида тарбиялашда ва миллий урф-одат, анъаналаримизни асраб-авайлашда муҳим ўрин тутади.

Байрам тадбири санъат ва маданият ходимлари томонидан тайёрланган концерт дастури билан давом этди.