Фото: «Халқ сўзи»

Ёшларнинг ижтимоий-маънавий дунёқарашини мустаҳкамлаш, улар фикрлаш доирасини кенгайтириш ва ватанга муҳаббатини шакллантиришда адабиётга ошнолик, ҳусусан, китоб мутолаасига жалб этишнинг ўрни катта. Айни мақсадда юртимизда анъанага айланган “Зукко китобхон” танлови миллионлаб ўғил-қизларни ўзларининг бўш вақтларини бадиий адабиётларни ўқиш билан мазмунли ўтказишга сафарбар этаётгани билан аҳамиятлидир.

Кеча республикамизнинг барча ҳудудларида танловнинг вилоят босқичи катта уюшқоқлик билан ташкил этилгани ҳам бунинг яққол тасдиғидир. Наманган шаҳридаги “Ёшлар маркази”да бўлиб ўтган шундай тадбирда танловнинг саралаш босқичлари ғолиби бўлган 84 нафар иштирокчи ўзининг китобхонлик салоҳиятини синовдан ўтказди.

Танлов низомига кўра, вилоят босқичи қатнашчиларига белгиланган вақт оралиғида жавоб қайтариш учун 20 тадан савол тақдим этилди. Улар май ойида ўқиш учун тавсия қилинган Маҳмухўжа Беҳбудийнинг “Жадидлар” тўплами, Ўткир Ҳошимовнинг “Дунёнинг ишлари”, Жеймс Клирнинг “Атом одатлар” асарлари юзасидан берилган саволларга жавоб қайтариш орқали ҳотирада сақлаб қолиш, асар қаҳрамонларига муносабат ва мустақил фикрлаш ҳусусиятларини намойиш этдилар. Пировардида, қўйилган саволларнинг 16 тасига батафсил жавоб қайтарган Косонсой тумани жамоаси биринчи ўринга муносиб топилди. Кейинги фаҳрли ўринлар эса Норин ва Мингбулоқ туманларидан келган ёшларга насиб этди.

Танлов ташкилотчиси – Ёшлар ишлари агентлиги зукко китобхонларни муносиб рағбатлантирди. Косонсойликлар жамоаси 6 миллион сўм пул мукофоти жойлаштирилган сертификат билан тақдирланди. Норинликларга 4,2миллион , мингбулоқликларга 3 миллион сўмлик соврин топширилди.

Қудратилла НАЖМИДДИНОВ, “Халқ сўзи”.