Фото: Халқ сўзи

Бундан бир неча йил аввал фаолият бошлаган «Наманган –саховат» хайрия жамоат фонди ижтимоий ҳимояга муҳтож, хусусан, боқувчисини йўқотган оилалар турмуш шароитини яхшилашга яқиндан кўмаклашмоқда. Яқинда аҳолининг ана шу қатламига мансуб фуқаролардан 24 нафарига янги битказилган кўп қаватли тураржой биносидан хонадонлар калити тантанали топширилди.

Эътиборли жиҳати шундаки, хайрия тариқасида тақдим этилган хонадонларнинг барчаси рўзғор юритиш учун зарур бўлган гилам-пойандозлар, ошхона буюмлари, ҳатто музлатгичгача бўлган жиҳозлар билан тўлдирилган.

— Давлатобод туманининг «Юксалиш» массивида 132 хонадонга эга 5 та уч қаватли тураржой бинолари қурилишини ўтган йили бошлаган эдик, — дейди фонд фаоли Маъруфхон Мўминов. — Қурилиш ашёлари, бинокорлик юмушлари харажатини қоплашга юзлаб саховатли юртдошларимиз беминнат қўл чўзишмоқда.

Айни кунларда эҳтиёжманд инсонлар учун мўлжалланган ва «Жаннат қасрлари» деб номланган тураржойлар қурилиши жадал давом эттирилмоқда. Улар ҳам яқин вақт орасида навбатма-навбат битказилиб, ўз соҳибларига топширилади.

Қудратилла НАЖМИДДИНОВ, «Халқ сўзи».