Foto: Халқ сўзи

Bundan bir necha yil avval faoliyat boshlagan “Namangan –saxovat” xayriya jamoat fondi ijtimoiy himoyaga muhtoj, xususan, boquvchisini yoʻqotgan oilalar turmush sharoitini yaxshilashga yaqindan koʻmaklashmoqda. Yaqinda aholining ana shu qatlamiga mansub fuqarolardan 24 nafariga yangi bitkazilgan koʻp qavatli turarjoy binosidan xonadonlar kaliti tantanali topshirildi.

Eʼtiborli jihati shundaki, xayriya tariqasida taqdim etilgan xonadonlarning barchasi roʻzgʻor yuritish uchun zarur boʻlgan gilam-poyandozlar, oshxona buyumlari, hatto muzlatgichgacha boʻlgan jihozlar bilan toʻldirilgan.

— Davlatobod tumanining “Yuksalish” massivida 132 xonadonga ega 5 ta uch qavatli turarjoy binolari qurilishini oʻtgan yili boshlagan edik, — deydi fond faoli Maʼrufxon Moʻminov. — Qurilish ashyolari, binokorlik yumushlari xarajatini qoplashga yuzlab saxovatli yurtdoshlarimiz beminnat qoʻl choʻzishmoqda.

Ayni kunlarda ehtiyojmand insonlar uchun moʻljallangan va “Jannat qasrlari” deb nomlangan turarjoylar qurilishi jadal davom ettirilmoqda. Ular ham yaqin vaqt orasida navbatma-navbat bitkazilib, oʻz sohiblariga topshiriladi.

Qudratilla NAJMIDDINOV, “Xalq soʻzi”.