Фото: Videodan kadr

Давлат солиқ хизмати органлари Қашқадарё вилояти Нишон туманида содир бўлган ҳолат юзасидан ўз муносабатини билдирди. Бу ҳақда қўмита матбуот хизмати хабар бермоқда.

«Қашқадарё вилоятида жойлашган мактаблардан бирида бўлган ҳолатни ноўрин хатти-ҳаракат деб ҳисоблайди ва кескин қоралайди. Камчиликларга йўл қўйган ходимларга нисбатан хизмат текшируви тайинланди», дейилади хабарда.

Ҳолат юзасидан Болалар омбудсмани ҳам муносабат билдирди. «Мактаб ўқув жараёни иштирокчиси бўлмаган бегона шахсларни таълимга оид тартиб-қоидаларини қўпол равишда бузган ҳолда дарс жараёнига кириб бориши ва уни бузиши, болаларга қандайдир ноқонуний талаблар билан мурожаат қилиши — мутлақо йўл қўйиб бўлмайдиган ҳолат!», дейилади муносабат матнида

Шунингдек, омбудсман болаларнинг ўз ота-оналарининг солиққа оид мажбуриятлари учун жавобгар эмаслиги, ҳеч бир ҳолатда уларни бу жараёнга жалб қилиш, огоҳлантириш мумкин эмаслигини билдирган.

«Бу боланинг Конституция ва қонун билан қўриқланадиган ҳуқуқ ва манфаатларига зиддир. Бундай ножўя ҳаракатларга йўл қўйган масъулларга тегишли тарзда чора кўрилиши шарт», дейилади хабарда.

Аввалроқ, бир йилда истеъмол секторидаги товарларнинг нархи 10 фоиздан кўпроққа ошгани ҳақида хабар берилганди.