Foto: Videodan kadr

Davlat soliq xizmati organlari Qashqadaryo viloyati Nishon tumanida sodir boʻlgan holat yuzasidan oʻz munosabatini bildirdi. Bu haqda qoʻmita matbuot xizmati xabar bermoqda.

“Qashqadaryo viloyatida joylashgan maktablardan birida boʻlgan holatni nooʻrin xatti-harakat deb hisoblaydi va keskin qoralaydi. Kamchiliklarga yoʻl qoʻygan xodimlarga nisbatan xizmat tekshiruvi tayinlandi”, deyiladi xabarda.

Holat yuzasidan Bolalar ombudsmani ham munosabat bildirdi. “Maktab oʻquv jarayoni ishtirokchisi boʻlmagan begona shaxslarni taʼlimga oid tartib-qoidalarini qoʻpol ravishda buzgan holda dars jarayoniga kirib borishi va uni buzishi, bolalarga qandaydir noqonuniy talablar bilan murojaat qilishi — mutlaqo yoʻl qoʻyib boʻlmaydigan holat!”, deyiladi munosabat matnida

Shuningdek, ombudsman bolalarning oʻz ota-onalarining soliqqa oid majburiyatlari uchun javobgar emasligi, hech bir holatda ularni bu jarayonga jalb qilish, ogohlantirish mumkin emasligini bildirgan.

“Bu bolaning Konstitutsiya va qonun bilan qoʻriqlanadigan huquq va manfaatlariga ziddir. Bunday nojoʻya harakatlarga yoʻl qoʻygan masʼullarga tegishli tarzda chora koʻrilishi shart”, deyiladi xabarda.

Avvalroq, bir yilda isteʼmol sektoridagi tovarlarning narxi 10 foizdan koʻproqqa oshgani haqida xabar berilgandi.