Бош прокуратура ташаббуси билан “NavrUz” этнофестивали, “Ралли Мўйноқ” автомобиль спорти мусобақалари, Миллий от ўйинлари турнири, “Muynak Sand Cup - 2022” соҳил футболи ва волейбол ўйинлари бўйича турнир, “Халқлар дўстлиги куни” фестивали ва бошқа бир қатор тадбирлар ўтказилмоқда.

Шунингдек, “Ҳунармандлар аллеяси”, “Шоирлар аллеяси”, “Юрта” ҳунармандчилик маркази ва хостели, “Балиқчининг уйи” музейи ва селфи объектлар фойдаланишга топширилиб, ҳозирги кунда хорижий ва маҳаллий туристларга хизмат қилмоқда.

Ушбу йўналишдаги ишларни давом эттириш мақсадида Бош прокуратура ташаббуси ва кўмагида Мўйноқ туманида www.yurtashop.uz онлайн сувенир дўкони ишга туширилди.

Онлайн дўконни ишга туширишдан асосий мақсад — Қорақалпоғистон Республикаси, жумладан Мўйноқ тумани ҳунармандларини қўллаб-қувватлаш, улар томонидан ишлаб чиқарилаётган маҳсулотларни ички ва ташқи бозорларда сотилишига ёрдам бериш, туманга ташриф буюрувчи туристларга ва маҳаллий ҳунармандчилик маҳсулотларига қизиқувчиларга сифатли ва арзон сувенирларни сотишни йўлга қўйишдан иборат.