Фото: Кинематография агентлиги

Кинематография агентлиги буюртмасига биноан суратга олинган «Мерос» фильми Халқаро кинофестивалларда иштирок этишда ва совриндор бўлишда давом этмоқда. 

Покистонда ўтказилган «Makizhmithran International Film Festival» Халқаро кинофестивалида қатнашган мазкур фильм «Энг яхши режиссёрлик иши» номинациясида ғолиб деб топилди.

«Мерос» фильми қозоқ ва ўзбек халқларининг эътиқод бирлиги, анъаналари ва кўп асрлик дўстлиги ҳақида ҳикоя қилади. Ўзбек миллатининг нақадар юксаклиги, халқалар ўртасидаги дўстлик, меҳр-оқибат ва бағрикенглик тушунчаларини ўзида намоён этган, қўшни халқаларнинг тақдирига эътиборсиз бўлмаган ўзбеклар ҳаёти акс эттирилган ушбу фильм фестивалнинг бошқа иштирокчиларини ҳам хайратда қолдира олди дейиш мумкин. Буни айнан фестиваль қатнашчилари, хорижий давлатлар вакиллари билдирган изоҳлардан ҳам билиш мумкин.

«Ўзбек фильмларининг хорижий кинофестивалларда иштирок этиши бу ўзбек кинематографияси учун ажойиб воқеликдир. Бизнинг фильмлар ҳам мана шундай фестивалларда қатнашиб, намойиш этилаётгани ва совриндор бўлаётгани билан бир қаторда халқаро кино экспертлар томонидан эътироф этилиши ҳам кишини мамнун этади. Покистондаги фестиваль иштирокчилари «Мерос» фильмига нисбатан “ақлбовар қилмас фильм” деган таърифни берганларидан шодландим. Ўйлайманки, яқин келажакда ўзбек кино санъати янада улкан чўққиларни забт эта олади!», - деди фильм сценарий муаллифи ва режиссёри Ҳилол Насимов.

Шуни ҳам таъкидлаш жоизки, фильм жорий йилнинг май ойида Россияда бўлиб ўтган «Золотой Витяз» кинофорумида «Қозоқ ва ўзбек халқлари ўртасидаги анъана ва муносабатларнинг умумийлиги мавзусини очиб бергани учун» махсус диплом билан тақдирланган. Шу билан бирга июль ойида Ҳиндистонда ўтказилган «Олтин тулпор» («Golden Horse Film Festival») Халқаро кинофестивалида ҳамда 9-13 сентябрь кунлари Покистонда ўтказиладиган «Gandhra Independent Film Festival» (GIFF) Халқаро кинофестивали «Энг яхши хорижий фильм» ва «Энг яхши режиссёрлик иши» номинациялари бўйича ғолиб бўлган эди.

«Мерос» фильми шу кунгача ўндан ортиқ халқаро фестивалларда «Йилнинг энг яхши фильми», 4 та фестивалда «Энг яхши режиссёрлик иши» номинациялари ғолиби бўлган. Кинокартина куни кеча Россиянинг «Киношок» кинофестивали конкурс рўйхатидан ҳам жой олди. Шунингдек, фильм тез кунларда «Лучезарний ангел» (Россия) ҳамда жорий йилнинг 4 октябридан 22 ноябригача ўтказиладиган Австралиянинг «Muslim Film Festival» кинофестивалида иштирок этади.