Россия ҳамда Украина ўртасидаги можаро қарийб уч йилдан буён давом этмоқда. 2022 йилнинг 24 февраль тонгида Россия армияси Украинага ҳужум бошлаган эди. Бугунги кунда кўплаб таҳлилчилар урушнинг қачон ва қандай тугаши ҳақида бир қанча тахминларни илгари суришмоқда.

Жумладан, «The Times» нашри ҳам Украина Россия уруши якуни борасидаги тўртта тахминни илгари сурди.

Биринчи тахмин – Украинанинг мағлубияти

Агар Россия урушни давом эттиришни ва музокаралардан воз кечишни танласа, Украина АҚШ ёрдамидан узилиб қолади. Бунинг натижасида Украина ҳарбий жиҳатдан мағлубиятга учрайди. Мамлакат урушда енгилса, глобал хавфсизликка таъсири АҚШнинг Афғонистондан олиб чиқиб кетилишидан ҳам кучлироқ бўлади. Миллионлаб украиналиклар қочқин сифатида мамлакатни тарк этишлари мумкин.

Иккинчи тахмин – ноқулай тинчлик битими

Икки мамлакатга ҳам манфаат келтирувчи келишув амалга ошмаса ёки Украинанинг АҚШ томонидан қўллаб-қувватланиши тўхтатилса мамлакат кучсиз ҳолатга тушади. Бунинг оқибатида Украина парчаланиб кетиши мумкин. Ғарб мамлакатларининг кўмагисиз Украина Россиянинг оғир шартларига рози бўлишга мажбур бўлади.

Учинчи тахмин – ўт очишни тўхтатиш

Украина ва Россия уруши ўт очишни тўхтатиш келишуви билан якун топса ҳар икки мамлакатда минтақавий барқарорликка ва иқтисодий ўсишга олиб келиши мумкин. Бу келишув ҳар икки мамлакат учун энг манфаатли қарор бўлади.

«Биз урушни тугатиш учун қўлимиздан келганини қилмоқчимиз. Урушни барқарор тарзда тугатишимиз керак. Бу уруш икки, уч ёки тўрт йил ичида қайта бошланишини хоҳламаймиз», — дейди АҚШ давлат котиби Марко Рубио

Тўртинчи тахмин – тинчлик келишувига эришиш

АҚШнинг кўмаги билан Украина суверенитетини сақлаб қолган ҳолда урушни тугатиб тинчликка эришиши мумкин. Лекин 1991 йилда тасдиқланган чегараларини қайтара олмайди. Агар тинчлик келишувига эришилса, Украина бой берган ҳудудларини Россиядан қайтариб олиши имконсиз бўлади.

АҚШ президенти Дональд Трамп Украина масаласида Путин билан музокара ўтказиш таклифини илгари сурмоқда. Агар Путин ушбу таклифни рад қилса, Трамп Россияга иқтисодий босимни кучайтириш билан таҳдид қилишини яшириб ўтирмаган.

Аввалроқ, Путин Трамп билан урушни якунлаш борасида Москва талабларини муҳокама қилиш учун учрашув ўтказишга розилик берган, аммо бу учрашув Украина томони иштирокисиз бўлиб ўтиши талаб қилинганлиги ҳақида хабар берилганди.