Адлия вазирлиги Ўзбекистон ногиронлар жамияти билан ҳамкорликда имконияти чекланган шахсларни бирлаштирувчи нодавлат нотижорат ташкилотлари фаолиятини янада қўллаб-қувватлаш мақсадида 2018 йилдан «Биз биргамиз!» («Мы вместе!», «We are together!») ижтимоий лойиҳасини амалга ошириб келмоқда.

Тошкент шаҳридаги Ёшлар ижод саройида «Биз биргамиз» ижтимоий лойиҳаси доирасида навбатдаги «Мафтункор ранглар жилоси» республика танлови бўлиб ўтди.

— Ушбу танловдан кўзланган асосий мақсад ногиронлиги бўлган ёшларнинг орасидан санъат ва спорт соҳаси бўйича иқтидорли ёшларни аниқлаш ҳамда муносиб тақдирлаш ҳисобланади, — дейди Адлия вазирлиги Жамоатчилик билан алоқалар бўлими бошлиғи Севара Ўринбоева. — Маълумот учун, 2019 йилда 7 ёшдан 17 ёшгача ногиронлиги бўлган иқтидорли ёшлар ўртасида расм чизиш бўйича «Мафтункор ранглар жилоси» республика кўрик танлови ташкил қилинган. 2020 йилга келиб мазкур танловнинг рассомчилик йўналишига шахмат спорт тури ҳам қўшилди.

«Биз биргамиз!» ижтимоий лойиҳаси “ECOBOZOR”, “KORZINKA.UZ” савдо мажмуалари раҳбарлари билан тузилган келишувлар асосида ушбу савдо нуқталарида иштирокчилар маҳсулотларини сотиш йўлга қўйилган.

Тадбирда расм чизиш ва шахмат спорт тури бўйича ўз ҳудудида ғолиб бўлган (ҳар бир вилоятдан биттадан) ўғил ва қизлардан иборат

28 нафар иштирокчи ҳамда уларнинг 28 нафар кузатувчилари иштирок этишди.

Танлов натижаларига кўра расм чизиш мусобақаси бўйича 3-ўринниХулкар Эгамберганова, 2-ўринни Лола Сирожова ва 1-ўринни Норжон Фаттоева эгаллади.

Спортнинг шахмат тури мусобақаси бўйича эса 3-ўринга Шаҳриёрбек Ғуломов, 2-ўринга Шеҳроз Даминов, 1-ўринга Хожиакбар Саидмуродов лойиқ топилди.

Танлов иштирокчиларининг барчасига ноутбук, шахмат, электр чойнак, китоб ва бошқа қимматбаҳо совғалар, медаль ва фахрий ёрлиқ билан тақдирланди.

Шунингдек, Адлия вазирлиги ҳузуридаги «Мадад» нодавлат нотижорат ташкилоти томонидан ногиронлиги бўлган шахсларга қонунчиликда белгиланган имтиёзлар бўйича тушунтириш материаллари танлов иштирокчиларининг ота-оналарига ва яқинларига тарқатилди.

Болалар томонидан яратилган санъат асарлари юксак баҳолашга арзийди, чунки бу асарларда ҳаётга бўлган меҳр ва интилиш, яшашга бўлган тиришқоқлик, келажакка бўлган орзу мутлақо ўзгача рангларда намоён бўлади.

«Халқ сўзи».