Adliya vazirligi Oʻzbekiston nogironlar jamiyati bilan hamkorlikda imkoniyati cheklangan shaxslarni birlashtiruvchi nodavlat notijorat tashkilotlari faoliyatini yanada qoʻllab-quvvatlash maqsadida 2018-yildan “Biz birgamiz!” («Mы vmeste!», «We are together!») ijtimoiy loyihasini amalga oshirib kelmoqda.

Toshkent shahridagi Yoshlar ijod saroyida “Biz birgamiz” ijtimoiy loyihasi doirasida navbatdagi “Maftunkor ranglar jilosi” respublika tanlovi boʻlib oʻtdi.

— Ushbu tanlovdan koʻzlangan asosiy maqsad nogironligi boʻlgan yoshlarning orasidan sanʼat va sport sohasi boʻyicha iqtidorli yoshlarni aniqlash hamda munosib taqdirlash hisoblanadi, — deydi Adliya vazirligi Jamoatchilik bilan aloqalar boʻlimi boshligʻi Sevara Oʻrinboyeva. — Maʼlumot uchun, 2019-yilda 7 yoshdan 17 yoshgacha nogironligi boʻlgan iqtidorli yoshlar oʻrtasida rasm chizish boʻyicha “Maftunkor ranglar jilosi” respublika koʻrik tanlovi tashkil qilingan. 2020-yilga kelib mazkur tanlovning rassomchilik yoʻnalishiga shaxmat sport turi ham qoʻshildi.

“Biz birgamiz!” ijtimoiy loyihasi “ECOBOZOR”, “KORZINKA.UZ” savdo majmualari rahbarlari bilan tuzilgan kelishuvlar asosida ushbu savdo nuqtalarida ishtirokchilar mahsulotlarini sotish yoʻlga qoʻyilgan.

Tadbirda rasm chizish va shaxmat sport turi boʻyicha oʻz hududida gʻolib boʻlgan (har bir viloyatdan bittadan) oʻgʻil va qizlardan iborat

28 nafar ishtirokchi hamda ularning 28 nafar kuzatuvchilari ishtirok etishdi.

Tanlov natijalariga koʻra rasm chizish musobaqasi boʻyicha 3-oʻrinni Xulkar Egamberganova, 2-oʻrinni Lola Sirojova va 1-oʻrinni Norjon Fattoyeva egalladi.

Sportning shaxmat turi musobaqasi boʻyicha esa 3-oʻringa Shahriyorbek Gʻulomov, 2-oʻringa Shehroz Daminov, 1-oʻringa Xojiakbar Saidmurodov loyiq topildi.

Tanlov ishtirokchilarining barchasiga noutbuk, shaxmat, elektr choynak, kitob va boshqa qimmatbaho sovgʻalar, medal va faxriy yorliq bilan taqdirlandi.

Shuningdek, Adliya vazirligi huzuridagi “Madad” nodavlat notijorat tashkiloti tomonidan nogironligi boʻlgan shaxslarga qonunchilikda belgilangan imtiyozlar boʻyicha tushuntirish materiallari tanlov ishtirokchilarining ota-onalariga va yaqinlariga tarqatildi.

Bolalar tomonidan yaratilgan sanʼat asarlari yuksak baholashga arziydi, chunki bu asarlarda hayotga boʻlgan mehr va intilish, yashashga boʻlgan tirishqoqlik, kelajakka boʻlgan orzu mutlaqo oʻzgacha ranglarda namoyon boʻladi.

“Xalq soʻzi”.