Бир қанча йирик нашрлар дунёнинг энг бой одами Илон Маск «Ливерпул» клубини сотиб олмоқчи эканлиги ҳақида хабарлар чоп этилмоқда. Матбуотга сиздирилаётган ушбу хабарлар юзасидан «қизиллар» раҳбарияти айрим тафсилотларни очиқлади.

Клуб эгалари Илон Маскдан клубни сотиб олиш борасида ҳеч қандай таклиф келиб тушмаганлигини маълум қилган. Бу ҳақида «Sky Sports» нашри хабар қилди.

Маскнинг инглиз клубини сотиб олмоқчи эканлиги ҳақидаги хабарлар унинг отаси Эррол Маскнинг интервюсидан сўнг оммалашиб кетган эди.

«У клубни сотиб олишни хоҳлайди. Ҳар ким хоҳлайди, мен ҳам хоҳлардим. Унинг бувиси Ливерпулда туғилган ва бизнинг Ливерпулда қариндошларимиз бор. Улар оиламнинг бир қисми билан бирга ўсган. Демак, биз Ливерпулга боғланганмиз», деганди у.

«Fenway Sports Group» хўжайини Жон Анри клуб ҳозирча сотилмаслигини, сотишдан ҳеч қандай манфаат кўрмаётганини таъкидлаган, дейилади хабарда.

Маълумотларга кўра, «Ливерпул» 2010 йилдан бери «Fenway Sports Group»га тегишли. «Forbes» журналининг сўнгги баҳосига кўра, «қизиллар» дунёдаги тўртинчи энг қиммат футбол клуби бўлиб, нархи 4,3 миллиард фунт стерлингни ташкил қилмоқда.