Bir qancha yirik nashrlar dunyoning eng boy odami Ilon Mask “Liverpul” klubini sotib olmoqchi ekanligi haqida xabarlar chop etilmoqda. Matbuotga sizdirilayotgan ushbu xabarlar yuzasidan “qizillar” rahbariyati ayrim tafsilotlarni ochiqladi.

Klub egalari Ilon Maskdan klubni sotib olish borasida hech qanday taklif kelib tushmaganligini maʼlum qilgan. Bu haqida “Sky Sports” nashri xabar qildi.

Maskning ingliz klubini sotib olmoqchi ekanligi haqidagi xabarlar uning otasi Errol Maskning intervyusidan soʻng ommalashib ketgan edi.

“U klubni sotib olishni xohlaydi. Har kim xohlaydi, men ham xohlardim. Uning buvisi Liverpulda tugʻilgan va bizning Liverpulda qarindoshlarimiz bor. Ular oilamning bir qismi bilan birga oʻsgan. Demak, biz Liverpulga bogʻlanganmiz”, degandi u.

“Fenway Sports Group” xoʻjayini Jon Anri klub hozircha sotilmasligini, sotishdan hech qanday manfaat koʻrmayotganini taʼkidlagan, deyiladi xabarda.

Maʼlumotlarga koʻra, “Liverpul” 2010-yildan beri “Fenway Sports Group”ga tegishli. “Forbes” jurnalining soʻnggi bahosiga koʻra, “qizillar” dunyodagi toʻrtinchi eng qimmat futbol klubi boʻlib, narxi 4,3 milliard funt sterlingni tashkil qilmoqda.