Мамлакатимиз туризм салоҳиятини кенг тарғиб этиш, жумладан, Хоразм вилоятига ташриф буюрувчи хорижий ва маҳаллий сайёҳлар сонини ошириш мақсадида жорий йилнинг 12-13 август кунлари Хива шаҳри “Ичан Қалъа” давлат музейи қўриқхонаси ҳудудида “Қовун сайли” фестивали ташкил этилмоқда.

Маданият ва туризм вазирлиги ҳамда Хоразм вилояти ҳокимлиги томонидан ҳамкорликда ўтказиладиган тадбирдан мақсад Хоразмнинг агротуризм салоҳияти намойиши, воҳанинг қадимий полизчилик тажрибаси, ширин-шакар қовун-тарвузлари ва боғдорчилик маҳсулотларининг ноёб турлари ва навларини кенг оммалаштиришдир.

Қовунларнинг “Гурвак”, “Қиличбой бешак”, “Қари қиз”, “Туя қовун”, “Тўёна”, “Ола замча”, “Хоразм оқ новвоти”, “Кўк гулоби”, “Бўрикалла” каби бир-биридан ширин ўнлаб маҳаллий навлари намойиш қилинади.

Бундан ташқари, турли мева-сабзавотлар, полиз экинлари, қандолат ва асаларичилик, ҳунармандчилик, чорвачилик ва балиқчилик маҳсулотлари кўргазмаси ҳам ташкил этилади.

Шунингдек, фестиваль доирасида, концерт дастурлари, тасвирий санъат асарлари намойиши, ҳунармандчилик маҳсулотлари кўргазмаси, дорбозлар ўйини, хон ва аёнлари чиқиши, қўғирчоқ театри томошалари, миллий таомлар тайёрлаш бўйича маҳорат дарслари, Хоразм нонини тайёрлаш бўйича маҳорат дарслари, миллий либослар кўргазмаси, жонли ижродаги саҳна кўринишлари ва бошқа маданий тадбирлар бўлиб ўтади.