Саминжон ҲУСАНОВ/«Халқ сўзи». Шаҳрихон туманидаги «Хўжаобод» маҳалласида яшовчи аҳолининг хурсандчилиги чексиз. Сабаби, ортда қолган 35 йил давомида ҳал бўлмай келаётган тоза ичимлик суви таъминоти йўлга қўйилиб, ҳар бир хонадонга «обиҳаёт» кириб борди. Бунинг учун манзилда 1 та сув қудуғи ва минораси ўрнатилиб, 1 та қудуқда таъмирлаш ишлари бажарилди.

— Бу маҳаллага кўчиб келганимга 35 йил бўлган бўлса, шундан буён ичимлик суви келмаган, — дейди Ҳамидахон Мамажонова. — Кўп қийинчилик кўрдик, айниқса, фарзандларимиз, келинларимиз сувни бир километр наридан ташиб келишга мажбур бўлишди. Шу қадар умидимизни узган эдикки, ҳатто маҳалламизга янги сув минорасини ўрнатишаётганида ҳам сув чиқишига ишонмадик. Бугун бўлса ҳар бир хонадонга сув жўмраклари ўрнатилди. Машаққатларимиз ортда қолганидан хурсандмиз.

«Хўжаобод» маҳалласида 825 та хонадонда 5107 нафар аҳоли истиқомат қилади. Мавжуд 7 та кўчанинг ҳаммасига ҳам ичимлик суви тармоғи тортилмаган эди. Шу боис ичимлик суви билан таъминланганлик даражаси 60 фоиздан иборат бўлган. Олиб борилган бунёдкорлик ишлари натижасида бу кўрсаткич 100 фоизни ташкил этди. Ҳудуддаги 425 та хонадон илк бор ичимлик суви билан таъминланди. Бу ҳам бўлса ҳамюртларимизнинг турмуш шароитига бўлган эътибор ифодасидир.