Фото: Халқ сўзи

Давлатимиз раҳбарининг 2021 йил 9 августда қабул қилинган «Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида»ги қарори турли сабабларга кўра оила ва ота-она меҳридан мосуво бўлган, мурғакликданоқ ҳаёт синовларига рўбарў келган ўғил-қизларнинг жамиятда ўз ўрнини топиши учун ҳар томонлама кўмаклашиш ишлари қамрови кенгайишига замин яратмоқда.

Ушбу ҳужжатга кўра етим ва ота-она қарамоғидан маҳрум болаларга улар 18 ёшга тўлган йилда кўп квартирали уй-жойлардан умумий майдони 25 квадрат метрдан кам бўлмаган 1 хонали, вояга етган етим болалар ўртасида никоҳ тузилган ҳолларда 50 квадрат метрдан кам бўлмаган 2 хонали квартиралар ажратилади.

Хоразм вилоятининг Хонқа туманида ана шундай ёшлардан икки нафари - Моҳира Аллаберганова ва Ғанижон Сотимбоевга давлат томонидан ажратилган янги хонадон ордери ва калитлари топширилди.

 — Севинчимни сўз билан ифодалаб беролмайман,  — дейди Моҳира Аллаберганова. — Ўз уйимиз бўлишини орзу қилардику, аммо бундай замонавий уй-жойга эга бўлиш етти ухлаб тушимизга ҳам кирмаган эди. Кўнгли ярим инсонларга бахтиёр яшаш қувончини бахш этаётган, инсон шаъни, қадр-қиммати улуғланаётган юртда яшаётганимиздан шукрона айтаман. Бу эътибор зиммамизга Ватанга садоқат билан хизмат қилиш масъулиятини юклайди.

Ўтган йили вилоятда етим ва ота-она қарамоғидан маҳрум бўлган болаларнинг 32 нафари уй-жой билан таъминланди. Бу йил ушбу тоифага мансуб ўғил-қизларнинг 18 ёшга тўладиган 47 нафарига янги хонадонлар топширилади.

Одилбек ОДАМБОЕВ, «Халқ сўзи».