Foto: Xalq so‘zi

Davlatimiz rahbarining 2021 yil 9-avgustda qabul qilingan «Yetim bolalar va ota-ona qaramogʻidan mahrum boʻlgan bolalarni davlat tomonidan qoʻllab-quvvatlashning yangi tizimini joriy etish chora-tadbirlari toʻgʻrisida»gi qarori turli sabablarga koʻra oila va ota-ona mehridan mosuvo boʻlgan, murgʻaklikdanoq hayot sinovlariga roʻbaroʻ kelgan oʻgʻil-qizlarning jamiyatda oʻz oʻrnini topishi uchun har tomonlama koʻmaklashish ishlari qamrovi kengayishiga zamin yaratmoqda.

Ushbu hujjatga koʻra yetim va ota-ona qaramogʻidan mahrum bolalarga ular 18 yoshga toʻlgan yilda koʻp kvartirali uy-joylardan umumiy maydoni 25 kvadrat metrdan kam boʻlmagan 1 xonali, voyaga yetgan yetim bolalar oʻrtasida nikoh tuzilgan hollarda 50 kvadrat metrdan kam boʻlmagan 2 xonali kvartiralar ajratiladi.

Xorazm viloyatining Xonqa tumanida ana shunday yoshlardan ikki nafari - Mohira Allaberganova va Gʻanijon Sotimboyevga davlat tomonidan ajratilgan yangi xonadon orderi va kalitlari topshirildi.

 — Sevinchimni soʻz bilan ifodalab berolmayman,  — deydi Mohira Allaberganova. — Oʻz uyimiz boʻlishini orzu qilardiku, ammo bunday zamonaviy uy-joyga ega boʻlish yetti uxlab tushimizga ham kirmagan edi. Koʻngli yarim insonlarga baxtiyor yashash quvonchini baxsh etayotgan, inson shaʼni, qadr-qimmati ulugʻlanayotgan yurtda yashayotganimizdan shukrona aytaman. Bu eʼtibor zimmamizga Vatanga sadoqat bilan xizmat qilish masʼuliyatini yuklaydi.

Oʻtgan yili viloyatda yetim va ota-ona qaramogʻidan mahrum boʻlgan bolalarning 32 nafari uy-joy bilan taʼminlandi. Bu yil ushbu toifaga mansub oʻgʻil-qizlarning 18 yoshga toʻladigan 47 nafariga yangi xonadonlar topshiriladi.

Odilbek ODAMBOYEV, «Xalq soʻzi».