Навоий вилояти ҳокими Нормат Турсунов Хитойнинг «Kashgar Changsheng Technology Co., Ltd» компанияси вакилларини қабул қилди. Қишлоқ хўжалиги маҳсулотларини етиштириш, қайта ишлаш, сақлаш ва логистика жараёнларига илғор технологияларни жорий этишга ихтисослашган мазкур компания Евроосиё бозорида фаол кенгаяётган йирик инвесторлардан саналади.

Учрашув давомида хитойлик ишбилармонлар Навоий вилоятида қишлоқ хўжалигини инновацион асосда ривожлантиришга қаратилган қатор таклифларни тақдим этди.

— Жумладан, 10 минг гектардан ортиқ ер майдонларида томчилатиб суғориш ленталари ишлаб чиқариш, уруғчилик, пахта тозалаш ҳамда тўқимачилик корхоналарини барпо этиш бўйича лойиҳалар тақдимоти ўтказилди, — дейди вилоят инвестициялар, саноат ва савдо бошқармаси бош мутахассиси Элёр Жумаев. — Инвесторлар ушбу объектларни барпо этиш ва ишга тушириш учун келгуси уч йилда камида 70 миллион доллар сармоя киритиш режасини маълум қилди.

Ҳоким Нормат Турсунов таклиф этилган лойиҳалар мутахассислар иштирокида атрофлича кўриб чиқилиши, шунингдек, ҳамкорликни тез фурсатда йўлга қўйиш учун амалий келишувлар ишлаб чиқилиши ҳақида маълум қилди.

Темур ЭШБОЕВ, «Халқ сўзи».