Қадимий Афшона қишлоғидан беш чақирим нарида Деҳча маҳалласи жойлашган. Бухоро вилояти Пешку туманидаги бу ҳамда унга қўшни маҳаллаларга борган кишининг эътибори иссиқхоналарга тушмай қолмайди. Деҳчада яшовчи Отабек Элмуродов ҳам томорқасида иссиқхона барпо этган. У қўш қаватли полиэтилен плёнка билан ўралган. Зарурат туғилганида кўмир билан иситилади.

— Оз эмас, кўп эмас, йигирма йил давомида она-юртимиздан олисда совуқ ўлкаларда ишладим, — дейди у. — Мусофирчиликнинг қийинчиликларини кўрдим. Мени доим нега ўзгаларнинг қўлида арзон- гаровга ишлаб, уларнинг рўзғорини бут қилишим керак, деган ўй тинчлик бермасди. Ниҳоят, уйга қайтишга қарор қилдим. Қишлоққа келиб, замонавий русумдаги машинанинг пулига шу иссиқхонани қурдим. Энди кўнглим хотиржам. Чунки оилам, болаларим бағридаман. Даромадим ҳам чакки эмас.

Отабек табиатан янгиликка ўч, изланишни канда қилмайди. Ўтган йилнинг апрелида тажриба тариқасида араб анори экди. 10 – 15 даража иссиқликда ўсувчи бу бу экиннинг ҳар бир тупидан 20 килограммгача ҳосил олиш мумкин. Меваси сап-сариқ бўлиб пишади. Шифобахш. Юрак-қон томир касалликлари, қанд хасталигини даволашда асқатади. У юртимиз бозорларига хориждан кириб келади.

— Оиламиз эҳтиёжидан ортганини қариндош-уруғларга тарқатдик, — дейди Отабек. — Бундан ташқари, 18 килограмм араб анорининг килосини 450 минг сўмдан буюртма асосида мижозларга етказдик.

Бу иссиқхонани мўъжаз бир зоопаркка ҳам қиёслаш мумкин. Унда бананнинг 8 хили, қизил киви, Таиланддан келтирилган аждар кўз дарахти ва ҳатто Туркиядан олинган, қишда гуллаб Наврўз кунларида пишадиган шафтоли кўчатлари ҳам бор. Италиядан икки минг доллари эвазига келтирилган қулупнай дарахти ҳамда фейхоа ўсимлигини айтмайсизми? Айтмоқчи, дунёнинг манаман деган мутахассислари фейхоани таркибида ёд миқдори кўплиги бўйича чемпион, дея эътироф этишган. Турган-битгани шифобахш саналган фейхоа меваси қон босими ошганда, шамоллаганда жуда фойдали. Ундан тайёрланган мураббо жуда мазали бўлади.

Отабек қизил киви қаламчасидан 400 туп кўчат тайёрлаган. Бу бутун бошли кивизор барпо этиш учун етарли. Фақат ер масаласи ҳал бўлса, бас. Тиниб-тинчимас бу инсон иссиқхонасида 45 минг туп помидор кўчати ҳам етиштирмоқда. Ҳозир бу кўчатларнинг бозори чаққон. Қаҳрамонимиз шунинг ўзидан 25 миллион сўм даромад олишни мўлжаллаб турибди.

Истам ИБРОҲИМОВ, “Халқ сўзи”.