Бош прокуратура ҳузуридаги Департаментнинг Бекобод шаҳри бўлими, ДХХ ва ИИБ ходимлари ҳамкорлигида тезкор тадбир ўтказилди, деб хабар бермоқда Иқтисодий жиноятларга қарши курашиш департаменти.

Унда айтилишича, ўтказилган тезкор тадбир давомида тамаки маҳсулотларининг ноқонуний савдоси билан шуғулланиб келган фуқаро А.Ж. Бекобод шаҳри, 14-даҳасидаги хонадонида умумий баҳоси 154,8 миллион сўмлик акциз маркасиз 6 минг 700 қути тамаки ва 236 қути электрон тамаки маҳсулотларини сотиш мақсадида сақлаб келганлиги аниқланган ҳамда ушбу маҳсулотлар ашёвий далил сифатида расмийлаштирилган.

Шу каби яна бир ҳолат, департаментнинг Бағдод тумани бўлими, ДХХ ва ИИБ ходимлари ҳамкорлигида ўтказилган тезкор тадбирда ҳам аниқланган.

Унга кўра, тамаки маҳсулотларининг ноқонуний савдоси билан шуғулланиб келган фуқаро А.Х. ва бошқалар фуқаро М.Х.га хорижда ишлаб чиқарилган, келиб чиқиши ва сифатини тасдиқловчи ҳужжатлари бўлмаган 5 минг қути акциз маркасиз тамаки маҳсулотларини 60 миллион сўмга сотган вақтида ашёвий далиллар билан қўлга олинган.

Ҳозирда мазкур ҳолатлар юзасидан Жиноят кодексининг 25, 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда муомалага киритиш ёки ишлаб чиқариш) билан жиноят ишлари қўзғатилиб, тергов ҳаракатлари бошлаб юборилган.