Гонконгнинг Тай По туманидаги Ван Фук Корт турар-жой мажмуасида содир бўлган ёнғинда камида 55 киши қурбон бўлди. Хитой махсус маъмурий ҳудуди бошқаруви раҳбари Жон Лининг маълум қилишича, воқеа жойида яна 250 дан ортиқ киши бедарак йўқолган.

Ҳокимият маълумотига кўра, ёнғин бино ташқи қисмидаги бамбукдан ясалган қурилиш нарвонларидан бошланган ва шамол таъсирида 2 000 та хонадон жойлашган саккизта бино бўйлаб тез тарқалган. Кўплаб аҳоли фуқаро муҳофазаси марказларига эвакуация қилинган. Гувоҳлар бир нечта бинода огоҳлантирув сигналлари ишламаганини ҳамда қўшниларни эшикма-эшик айланиб огоҳлантиришга мажбур бўлишганини айтмоқда.

Гонконг раҳбари барча турaр-жой массивларида давом этаётган қурилиш ва таъмирлаш ишлари шошилинч текширувдан ўтказилишини маълум қилди. Маҳаллий аҳолининг айтишича, ёнғин ўта тез тарқалган ва ўт ўчириш бўлинмалари нечта бинодаги офатни бартараф этиш учун етарли таркибга эга бўлмаган.

Ёнғин вақтида 37 ёшли ўт очирувчи хизмат вақтида ҳалок бўлган. У билан боғланиш жараёнида алоқа узилиб қолган ва ярим соат ўтгач, юзида кучли куйиш жароҳатлари билан топилган. Ҳозирда шифохоналарда 61 нафар жабрланувчи даволанмоқда: беморларнинг 15 нафари ўта оғир, 27 нафари оғир ва 19 нафари барқарор ҳолатда.

Фожиадан кейин юзлаб волонтёрлар кўчаларда ёрдам пунктлари ташкил қилиб, эвакуация қилинган аҳоли ва ўт ўчирувчиларга озиқ-овқат ҳамда зарур буюмлар тарқата бошлаган. Шунингдек, ҳайвонлар ҳуқуқи ташкилотлари бино ичида қолиб кетган мушук, ит ва бошқа уй ҳайвонларини қутқариш учун махсус гуруҳлар билан иш олиб бормоқда. Ҳозирга қадар камида 10 та мушук, 7 та ит ва бир неча калтакесаклар тирик ҳолда топилган.