Gonkongning Tay Po tumanidagi Van Fuk Kort turar-joy majmuasida sodir boʻlgan yongʻinda kamida 55 kishi qurbon boʻldi. Xitoy maxsus maʼmuriy hududi boshqaruvi rahbari Jon Lining maʼlum qilishicha, voqea joyida yana 250 dan ortiq kishi bedarak yoʻqolgan.

Hokimiyat maʼlumotiga koʻra, yongʻin bino tashqi qismidagi bambukdan yasalgan qurilish narvonlaridan boshlangan va shamol taʼsirida 2 000 ta xonadon joylashgan sakkizta bino boʻylab tez tarqalgan. Koʻplab aholi fuqaro muhofazasi markazlariga evakuatsiya qilingan. Guvohlar bir nechta binoda ogohlantiruv signallari ishlamaganini hamda qoʻshnilarni eshikma-eshik aylanib ogohlantirishga majbur boʻlishganini aytmoqda.

Gonkong rahbari barcha turar-joy massivlarida davom etayotgan qurilish va taʼmirlash ishlari shoshilinch tekshiruvdan oʻtkazilishini maʼlum qildi. Mahalliy aholining aytishicha, yongʻin oʻta tez tarqalgan va oʻt oʻchirish boʻlinmalari nechta binodagi ofatni bartaraf etish uchun yetarli tarkibga ega boʻlmagan.

Yongʻin vaqtida 37 yoshli oʻt ochiruvchi xizmat vaqtida halok boʻlgan. U bilan bogʻlanish jarayonida aloqa uzilib qolgan va yarim soat oʻtgach, yuzida kuchli kuyish jarohatlari bilan topilgan. Hozirda shifoxonalarda 61 nafar jabrlanuvchi davolanmoqda: bemorlarning 15 nafari oʻta ogʻir, 27 nafari ogʻir va 19 nafari barqaror holatda.

Fojiadan keyin yuzlab volontyorlar koʻchalarda yordam punktlari tashkil qilib, evakuatsiya qilingan aholi va oʻt oʻchiruvchilarga oziq-ovqat hamda zarur buyumlar tarqata boshlagan. Shuningdek, hayvonlar huquqi tashkilotlari bino ichida qolib ketgan mushuk, it va boshqa uy hayvonlarini qutqarish uchun maxsus guruhlar bilan ish olib bormoqda. Hozirga qadar kamida 10 ta mushuk, 7 ta it va bir necha kaltakesaklar tirik holda topilgan.