Foto: Getty Images

Suriyada qochqin qizning toʻy marosimi, Italiyada yer siljishi tufayli yuzaga kelgan xavf va “Taypey 101” binosini himoya vositalarisiz zabt etgan skalolaz — yakunlanayotgan haftada dunyo boʻylab turli voqealarning shiddati, insonlarning jasorat va muammolarga qarshi turishi fotosuratlarda jamlandi.

Quyida dunyodagi eng mashhur fotojurnalistlar tomonidan suratga olingan eng diqqatga sazovor lahzalarni koʻrishingiz mumkin:

Minneapolis, Minnesota, AQSH

Minneapolisda oʻtkazilayotgan ochiq muloqotda AQSH vakili Ilhan Omarning yuziga nomaʼlum modda sepib yuborgandan erkak zararsizlantirilmoqda.

Minneapolis, Minnesota, AQSH

Immigratsiya xizmati agenti tomonidan 37 yoshli AQSH fuqarosi Aleks Jeffri Pretti otib oʻldirilishi ortidan shahar aholisi norozilik namoyishiga chiqdi. Suratda federal agent namoyishchilarga qarata koʻzdan yosh oqizuvchi gaz toʻpchasini uloqtirmoqda.

Gʻarbiy Qoʻrb, Falastin

Ramalla yaqinidagi Kafr Akob qishlogʻidagi harbiy reyd paytida falastinlik oila Isroil xavfsizlik kuchlari tomon odimlamoqda.

Gʻazo, Falastin

Falastinlik bolalar markaziy Gʻazodagi Nuseyrat qochqinlar lagerida vayron boʻlgan binolar yaqinidagi maydondan gul termoqda.

Kiyev, Ukraina

Ukraina favqulodda vaziyatlar xizmati xodimlari Kiyevdagi havo hujumidan keyin yuz bergan yongʻinni oʻchirish uchun harakat qilmoqda.

Lima, Peru

Peruda prezident Joze Jerining isteʼfosini talab qilayotgan Z avlod namoyishchilaridan biri politsiyachilarning keskin qarshiligiga duch kelmoqda.

Qamishli, Suriya

Qamishlidagi maktab sinfxonasida Shimoliy Suriyadagi al-Tabqa shaharidan qochib chiqqan kelinning toʻy marosimi boʻlib oʻtmoqda. Ushbu maktab jangovar harakatlardan keyin boshpana sifatida foydalanilmoqda.

Nischemi, Italiya

Sitsiliya orolidagi Nischemi qishlogʻida yer siljishi (yorilib qulashi) yuz berdi. Chuqurlik kengayib borayotgani qishloqning tarixiy markazini xavf ostiga qoʻymoqda.

Jurm, Afgʻoniston

Afgʻonistonliklar togʻ choʻqqisidan turib, buzkashi musobaqasini kuzatmoqda (Buzkashi — ushbu mamlakatdagi anʼanaviy sportlardan biri hisoblanadi).

Taypey, Tayvan

Amerikalik skalolaz Aleks Xonnold Osiyoning eng baland binolaridan biri sanalgan “Taypey 101” koʻp qavatli binosini hech qanday himoya vositalarisiz zabt etmoqda.