Германиянинг Франкфуртдаги энг йирик аэропорти кемирувчи туфайли қисман электр қувватисиз қолди. Бу ҳақда «Spiegel» хабар берди.

Маълум қилинишича, кеча, 5 август куни тунда Франкфуртдаги энг йирик аэропортда авария сабаб электр энергиясида узилишлар юз берган. Электрдаги узилишга қўшимча равишда, терминал майдони қисман тутун билан қопланган.

Аэропорт вакилининг сўзларига кўра, зудлик билан фавқулодда захира қувват ёқилган, шунинг учун йўловчиларга ҳеч қандай хавф бўлмаган. Эрталаб нормал қувват тикланган. Бироқ авария багажни саралаш тизимидаги носозлик туфайли «Discover Airlines» ва «Lufthansa» авиакомпанияларининг парвозлар жадвалини бироз бузган.

Қайд этилишича, электр узилиши туфайли аэропортнинг 1-терминалидаги ҳудудлар зарар кўрган. Ушбу сектордан асосан «Lufthansa» авиакомпанияси фойдаланади.

Кейинчалик маълум бўлишича, ҳалокатга кемирувчи сабаб бўлган, чунки қисқа туташув содир бўлган жойда чайналган кабель ҳамда унинг ёнида сичқон ўлиги топилган.