Germaniyaning Frankfurtdagi eng yirik aeroporti kemiruvchi tufayli qisman elektr quvvatisiz qoldi. Bu haqda “Spiegel” xabar berdi.

Maʼlum qilinishicha, kecha, 5-avgust kuni tunda Frankfurtdagi eng yirik aeroportda avariya sabab elektr energiyasida uzilishlar yuz bergan. Elektrdagi uzilishga qoʻshimcha ravishda, terminal maydoni qisman tutun bilan qoplangan.

Aeroport vakilining soʻzlariga koʻra, zudlik bilan favqulodda zaxira quvvat yoqilgan, shuning uchun yoʻlovchilarga hech qanday xavf boʻlmagan. Ertalab normal quvvat tiklangan. Biroq avariya bagajni saralash tizimidagi nosozlik tufayli “Discover Airlines” va “Lufthansa” aviakompaniyalarining parvozlar jadvalini biroz buzgan.

Qayd etilishicha, elektr uzilishi tufayli aeroportning 1-terminalidagi hududlar zarar koʻrgan. Ushbu sektordan asosan “Lufthansa” aviakompaniyasi foydalanadi.

Keyinchalik maʼlum boʻlishicha, halokatga kemiruvchi sabab boʻlgan, chunki qisqa tutashuv sodir boʻlgan joyda chaynalgan kabel hamda uning yonida sichqon oʻligi topilgan.