Фото: Reuters

АҚШ Давлат котиби Энтони Блинкен Ғазо секторида ўт очишни тўхтатишнинг оқибатлари ҳақида фикр билдирди.

Миср ва Иорданиядан келган ҳамкасблари билан Амманда ўтказилган қўшма матбуот анжуманида Блинкен Ғазода ҳарбий ҳаракатларни тўхтатиб қўйиш эҳтимоли ҳақида фикр билдирди. АҚШ Давлат котибининг сўзларига кўра, ўт очишни тўхтатиш фақат Фаластиннинг ҲАМАС радикал ҳаракати кучларининг қайта тўпланишига олиб келади.

Блинкеннинг таъкидлашича, жанговар ҳаракатлардаги танаффус жангари ташкилотга қайта тўпланиш ва “7 октябрда қилган ишни қилиш” имконини беради. Шу билан бирга, баъзи Америка иттифоқчилари ўт очишни тўхтатиш ғоясини қўллаб-қувватламоқда.

Бунгача АҚШ Давлат котиби Энтони Блинкен Исроил Бош вазири Бинямин Нетаньяхуни тинч аҳолини хавфли ҳудудлардан олиб чиқиш учун гуманитар сулҳ ташкил этишга ундаганди. Исроил ҳукумати раҳбари эса бу таклифни рад этди ва “Биз ғалаба қозонмагунимизча тўхтамаймиз”, деди.

ҲАМАС етакчиларидан бири Усама Ҳамдан эса Ғазо секторидаги оммавий қотилликлар учун АҚШ ва шахсан президент Жо Байденни айблади.

Шу ўринда Ҳамдан Фаластин халқига қарши тажовузни тўхтатиш учун Вашингтонга босим ўтказишга чақирди. Унинг сўзларига кўра, Исроил жами 105 та тиббиёт муассасасига ҳужум қилган ва бешта касалхонани ишдан чиқарган. Шу сабабли маҳаллий клиникалар кўп сонли ярадорларга дош бера олмаяпти.

Олдинроқ, Ҳамдан  араб ва мусулмон давлатларининг Ғазо секторидаги вазият бўйича расмий позицияларини заиф, деганди.