Foto: Reuters

AQSH Davlat kotibi Entoni Blinken Gʻazo sektorida oʻt ochishni toʻxtatishning oqibatlari haqida fikr bildirdi.

Misr va Iordaniyadan kelgan hamkasblari bilan Ammanda oʻtkazilgan qoʻshma matbuot anjumanida Blinken Gʻazoda harbiy harakatlarni toʻxtatib qoʻyish ehtimoli haqida fikr bildirdi. AQSH Davlat kotibining soʻzlariga koʻra, oʻt ochishni toʻxtatish faqat Falastinning HAMAS radikal harakati kuchlarining qayta toʻplanishiga olib keladi.

Blinkenning taʼkidlashicha, jangovar harakatlardagi tanaffus jangari tashkilotga qayta toʻplanish va “7-oktabrda qilgan ishni qilish” imkonini beradi. Shu bilan birga, baʼzi Amerika ittifoqchilari oʻt ochishni toʻxtatish gʻoyasini qoʻllab-quvvatlamoqda.

Bungacha AQSH Davlat kotibi Entoni Blinken Isroil Bosh vaziri Binyamin Netanyaxuni tinch aholini xavfli hududlardan olib chiqish uchun gumanitar sulh tashkil etishga undagandi. Isroil hukumati rahbari esa bu taklifni rad etdi va “Biz gʻalaba qozonmagunimizcha toʻxtamaymiz”, dedi.

HAMAS yetakchilaridan biri Usama Hamdan esa Gʻazo sektoridagi ommaviy qotilliklar uchun AQSH va shaxsan prezident Jo Baydenni aybladi.

Shu oʻrinda Hamdan Falastin xalqiga qarshi tajovuzni toʻxtatish uchun Vashingtonga bosim oʻtkazishga chaqirdi. 

Uning soʻzlariga koʻra, Isroil jami 105 ta tibbiyot muassasasiga hujum qilgan va beshta kasalxonani ishdan chiqargan. Shu sababli mahalliy klinikalar koʻp sonli yaradorlarga dosh bera olmayapti.

Oldinroq, Hamdan  arab va musulmon davlatlarining Gʻazo sektoridagi vaziyat boʻyicha rasmiy pozitsiyalarini zaif, degandi.